El Sporting remontó xugando con ocho

El llabor del árbitrio Rodado emporcó un partíu en que'l Sporting acabó con ocho xugadores. Rubén metió nel últimu intre'l gol del empate a dos, que val p'aguantar la cuarta plaza.

El equipu de Marcelino llegó a Eibar con too a favor. Más de 4.000 aficionaos asturianos nun estadiu en qu'entren 5.000 persones aseguraben un gran día colos futbolistes del Sporting altos de moral tres de ganar al Ciudá de Murcia por 4-1 la otra selmana. Namás entamar el partíu viose que l'Eibar diba ser duru de royer, pero nel minutu 24 y Ismael disfrutó de la primer ocasión clara. Los dos equipos marcharon pa la caseta ensin marcar nel primer tiempu, y la cosa pintaba que diba ser una dura llucha por abrir la pesllera eibarresa, que defendía trancando'l centru del campu.

Nada que ver colo que diba pasar darréu. Namás entamar el segundu tiempu, Rodado Rodríguez señaló un penalti enforma duldosu de Samuel sobre Brit que ponía en ventaya al equipu armeru.

El Sporting aguantó'l primer güelpe y empató en dos minutos con tiru rasu de Dani Borreguero. Faltó-y tiempu entós a Rodado pa pitar penalti y tarxeta encarnada de Yago sobre Brit. El Sporting quedaba con diez y perdía 2-1. Col partíu rotu y el Sporting perdiendo los papeles, llegó la espulsión de Daviz Bauzá y poco dempués la de Christian Díaz, que dexaba al equipu con 8, mientres que l'Eibar perdía a Saizar. El Sporting buscó entós l'empate a la desesperada, xubiendo a rematar hasta'l rebatiador asturianu. En medio d'un bastiazu d'insultos al árbitrio, dende la banda mandaron espurrir el partiu cuatro minutos.

Yera la última oportunidá d'iguar el desatre, y, tres d'una riestra de corneres, Rubén, l'home clave de les segundes partes, foi a rematar de cabeza'l gol que valía ún puntu y la vergoña del equipu. Énte la presión ambiental, l'árbitrio nun dexó nin sacar de centro, pitando'l final del alcuentru.

El públicu, que nun quería marchar de la grada, agradeció-y al equipu la llucha y los xugadores salieron al centru del campu a saludar, anque la cosa nun acabó en paz, rexistrándose dellos incidentes na grada cola cayida d'un espectador dende una altura de metru y mediu y col llanzamientu d'una banqueta de plástico al prau. La imaxe del enfrentamientu de la Ertzaina colos ultres del Sporting emporcó l'hermanamientu ente les dos aficiones, que pola mañana ficieren una espicha conxunta.