Felpeyu presenta discu nuevu

"Yera una noticia esperada na música asturiana y agora yá tien fecha. El grupu de folk Felpeyu saca discu y va presentalu n'Uviéu'l próximu 12 d'abril. Los felpeyos volvieron esti añu al estudiu de grabación fieles al soníu que lleven trabayando y evolucionando dende que ñacieron, anque cada discu nuevu ye un retu y la primer preba de fueu ye pal próximu 12 d'abril.

Dende'l so últimu trabayu ""YÁ!"" bien de coses pasaron nel grupu, cambeos marcaos principalmente pol accidente nel que perdieron la vida Ígor Medio y Carlos Redondo en xunu de 2006. Agora la banda cuenta con un cantante qu'arriendes toca'l baxu, Dudu Puente, y el que yera vigulineru del grupu Fernando Oyagüez pasó a ocupase del bouzouki.

Per otra parte incorporóse al grupu un guitarrista como Moises Suárez, mientres que'l resto de componentes, Xuan Nel Expósito col curdión, Ruma Barbero nel bodhran, Lisardo Prieto tocando'l vigulín amás de poner voz, y Diego Pangua cola gaita y la xiblata, siguen como siempre.

La cita colos cantares nuevos de Felpeyu ye'l próximu sábadu 12 d'abril nel Teatru Filarmónica d'Uviéu, costando la entrada namás que 5 €."