"La oficialidá ye la gran asignatura pendiente de la democracia n'Asturies"

Énte un auditoriu qu'enllenó'l salón d'actos de la casa de Cultura d'Avilés, la presidenta de l'Ala entamó'l so discursu pidiendo que, n'honor al topónimu orixinal de la villa, se-y permitiere referise a la villa del Adelantáu como "Abillés". Tres d'ello, la presidenta sorrayó'l valor del conceyu avilesín como tierrra d'acoyida de bien d'inmigrantes y tamién como llugar de nacimientu de grandes escritores y artistes, faciendo un repasu qu'entamó con Marcos del Torniello y acabó con Adolfo Camilo Díaz y otros de les nueves xeneraciones. Darréu, Ana Cano tuvo tamién palabres p'alcordase de los profesores de Valliniello, escuela que fvoi ún de los centros piloto que, va agora venti años, entamaron cola enseñanza del astutianu nes sos aules.

La llista d'agradecimientos y recuerdos siguió col nuevu académicu José Antonio Fernández Vior, col que la presidenta tien una rellación bien estrencha en cuantes que-y dirixó la so tesis doctoral y remató con un recuerdu a la figura d'Andrés Solar, al que se-y dedica esti añu la Selmana de les Lletres. A los venti años de la so muerte, Ana Cano refirióse a la dimensión histórica del escritor como persona qu'asumió un claru compromisu cola llingua "nun momentu en que yera preciso"

La presidenta de l'Alla fizo un balance en positivo del llabor de la institución nestos venti años, nos que l'Academia igüó tolos testos normativos básicos pa facer un modelu estandar d'asturianu que faiga de la llingua una ferramienta normal y válida pa cualquier contestu comunicativu. Valiéndose de los datos del II Estudiu Sociollingüísticu, Ana Cano esplicó qu'esta ye una llingua apreciada pola sociedá, que demanda claramente la so normalización.

Ehí entamaron les crítiques, que nunca nun suelen faltar nel discursu oficial de l'Alla. Ana Cano denunció que los pasos del poder políticu na xera normalizadora foron siempre "pocos, probes y curtios". El repasu al llabor de instituciones polítiques entamó pol conseyeru d'Educación, José Luis Iglesias Riopedre, recordando l'Alla como'l cambéu de nome de l'asignatura de llingua asturiana a "bable-asturianu" supunxo muncho más qu'una cuestión cenciellamente nominal, denunciando que los curriculos d'asturianu tan ensin aprebar anque tan fechos y qu'hai neños que, "anque quieran, nun puen estudiar llingua asturiana". La presidenta de l'Alla evitó nomar a la persona del Director de la Oficina Ramón d'Andrés, resumiéndo la so negativa valoración sobre la política llingüística del Gobiernu autonómicu en que "nada aprució nin tien traza d'aprucir".

La Universidá foi el oxetivu que vieno darréu. En palabres d'Ana Cano, les pasaes elecciones a Rector valieron, pa que'l tema del asturianu tuviere, por primer vegada, presente nunes elecciones d'esti tipu, cosa que la presidenta quixo agradece-yos a profesores, emplegaos y, sobremanera, estudiantes de la Universidá, nuna referencia bastante clara al papel na campaña a rector de la Xunta Pola Defensa de la Llingua. Ana Cano, que ye amás decana de la Facultá de Filoloxía, alvirtió al nuevu rector que too ello tien que da-y que pensar sobre la normalización del asturianu na másima institución d'enseñanza superior d'Asturies. Ana Cano declaró que l'Alla "allampia por una universidá que valga pa tar n'Asturies y que tea al so serviciu" y renovó'l so compromisu de defender xunta'l Rector la creación de la Llicenciatura en Filoloxía Asturiana.

La esixencia de la oficialidá centró la parte final del discursu de la presidenta de l'Alla, quien esclarió que, en cualquier parte del mundu, la declaración d'oficialidá siempre vien primero de cualquier llei normalizadora. Según Ana Cano, l'Alla ta dimpueta a collaborar coles instituciones pa sacar el procesu alantre, pero va ser siem pre crítica colos que "xueguen a facer que faen, a confundir y a desmovilizar". Dempués de calificar la oficialidá como la "gran asignatura pendiente de la democracia n'Asturies" Ana Cano llamó a tolos partíos y a organizaciones sociales a trabayar pol futuru de la llingua , despidiendo'l discursu con un poema d'Andrés Solar