La reivindicación d'oficialidá sintiose bien alto n'Avilés

La tradicional marcha reivindicativa de la Xunta pola Defensa de la Llingua previa a los actos oficiales de l'Academia de la Llingua contó con una participación mínimamente menguada pol desplazamientu de los actos de la capital d'Asturies a la villa d'Avilés.

La policía del Conceyu peritó en 2.500 persones l'asistencia a una manifestación que, saliendo de la estación de la RENFE, atravesó tol cascu antiguu d'Avilés hasta llegar a la casa de Cultura. Amás de les pancartes de la Xunta, distintos grupos políticos y culturales espeyaron la so presencia na manifestación, con abondancia de pancartes del partíu políticu Andecha Astur y presencia tamién d'Izquierda Asturiana, Partíu Asturianista y Izquierda Unida-Bloque por Asturies ente otros. Los representantes d'esta última organización, que forma parte del actual executivu asturianu recibieron pallabres dures y crítiques de dellos manifestantes.

Al acabar la marcha cívica, la Xunta lleó'l so manifiestu, qu'esti añu centróse en facer balance del añu que lleva en poder el nuevu gobiernu asturianu de coalición. Pa la Xunta la sensación que queda tres d'estos primeros 365 díes ye de "decepción" en cuantes que'l pautu de gobiernu nun supón más qu'un desarrollu curtiu de la llei d'usu.

La Xunta criticó'l retrasu en poner en cargu al responsable de la oficina de Política Llingüística, y, anque dexó claro que la organización "nun dulda" de la competencia de Ramón d'Andrés pa llevar alantre un procesu normalizador, entiende que la estructura dende la que se pretende llevar alantre esi procesu nun val pa ello, esixendo la "creación d'una Dirección Xeneral de Política Llingüística con rangu y presupuestu abondu". La esixencia de la oficialidá nuna posible reforma estatutaria y un balance negativu de la situación en cuantes que s'aprecia que'l procesu de desapaición la llingua ta acelerándose hasta facese visible "en tiempu real" completaron el discursu de la organización cívica, que cumplió con esti, venti años organizando esta manifestación.