El gobiernu aprobó subvenciones pa caltener los servicios de normalización

"El conseyu de Gobiernu del Principáu d'Asturies aprobó, na so sesión d'esta selmana, celebrada'l pasáu xueves, la concesión de subvenciones por un importe global de 162.458 euros a distintos conceyos y mancomunidaes pal funcionamientu de los sos Servicios y Oficines de Normalización Llingüística. Los conceyos beneficiaos pola ayuda y que van poder asina da-yos continuidá a los sos servicios van ser L.lena, Cangas del Narcea, Samartín del Rei Aurelio, Mancomunidá del Cabu Peñes, Mancomunidá de la Comarca de la Sidra, Llangréu, Mieres, Siero y Avilés.

Los Servicios de normalización aseguren asina un añu más de funcionamientu, pero esti vuelve a financiase, otra vegada más, per aciu de subvenciones, cuando los trabayadores d'estos servicios lleven pidiendo dende hai tiempu que los servicios pasen a acoyese a un conveniu que-yos asegure un marcu de mayor estabilidá."