Alonso, quintu meyor tiempu na segunda sesión d’entrenos

Una tribuna entera pintada d'azul, el color de la bandera asturiana,
p'asitiar nella la invasión d'aficionaos asturianos qu'esti fin de
selmana tienen tomáu al asaltu'l circuitu de Montmeló, au se
disputa esti fin de selmana'l Gran Premiu d'España de Fórmula-1,
quinta carrera del calandariu y na que'l pilotu asturianu Fernando Alonso tien
el retu d'intentar meyorar el segundu puestu que consiguiere l'añu
pasáu tres del inalcanzable Michael Schumacher, un llabor dificil en
cuantes que l'alemán de Ferrari ye entovía más superior
que na temporada 2.003 y qu'amás el Renault d'Alonso tampoco nun ta finu
como pa disputá-y el trunfu.



Con too y con ello, Alonso quier da-y una allegría a la xente de
casa, y de momentu güei ta acabante de facer el quintu meyor tiempu nos
segundos entrenos cronometraos, a la espera de los definitivos de mañana
sábadu que van ser los que dean la parrilla de salida pal Gran Premiu
del domingu. Alonso quedó a menos d'un segundu del Honda de Button, que
foi'l más rápidu nestos entrenos. Alonso dexó atrás
a los dos Ferrari, y solo foi superáu polos dos Honda, el Toyota de
Zonta, y el Willians de Ralf Schumacher . Conozse que los Bar-Honda y los
Toyota van tener muncho que dicir el domingu, al tenor de los tiempos d'estos
entrenos.



Asina quedaron los 10 primeros puestos:

1.Jenson Button (GBR) Honda (1:15.935)

2.Anthony Davidson (GBR) Honda (1:16.188)

3.Ricardo Zonta (BRA) Toyota (1:16.360)

4.Ralf Schumacher (GER) Williams (1:16.433)

5.Fernando Alonso (ESP) Renault (1:16.534)

6.Rubens Barrichello (BRA) Ferrari (1:16.698)

7.Michael Schumacher (GER) Ferrari (1:16.729)

8.Jarno Trulli (ITA) Renault (1:16.734)

9.Kimi Raikkonen (FIN) McLaren (1:16.798)

10.Cristiano Da Matta (BRA) Toyota (1:16.833)