Selmana de les lletres en Llangréu

La XXV Selmana de les Lletres Asturianes celébrase tamién en Conceyu Llangréu, onde l'Área de Política Llingüística entama delles actividaes de promoción de la Llingua Asturiana col envís d'afalar l'usu de la llingua asturiana ente tolos escolinos y llangreanos en xeneral.

Asina, mañana xueves 6 de mayu va presentase públicamente'l llibru qu'algamó la primer edición del Concursu de Narrativa en Llingua Asturiana Conceyu Llangréu. El llibru ganador d'esta primer edición ye la obra "Los Taraos", del afamáu escritor entreguín Pablo Rodríguez Medina
El mesmu xueves 6 y el vienres 7 mayu va facese-yos entrega a les escueles de la zona de dellos llotes de llibros con esta obra premiada y otres d'autores del conceyu y de les cuenques. Estos actos van complementase con llectures de cuentos y poemes nes escueles. Ente estos cuentos destacar "En Chigre" y "Toni", obres d'Andrés Solar, escritor al que se-y dedica esta edición de la Selmana de les Lletres, coles qu'álgamó en 1979 y 1980 el Premiu de Cuentos Curtios del Institutu Jerónimo González de Sama.

Como piesllu al programa d'actividaes de Llangréu, el cantante, compositor y guitarrista asturianu Toli Morilla va facer el sábadu en Teatru Nuevu de La Felguera l'espectáculu músico-poéticu-teatral "Nueche d'Insomniu" qu'amiesta lo musical cola divulgación de la poesía contemporánea escrita n´asturianu y l' homenaxe a los sos autores, tresmitiendo a la sociedá la plena validez de la espresión plural y universal d´un espectáculu alloñáu de tou tipu de tópicos fechu en llingua asturiana. Recordamos-yos a los llectores d'Asturies.com que regalamos, en collaboración col Conceyu de llangréu, cinco discos de Toli Morilla y 10 entraes pa poder velu esti sábadu. Güei miércoles ye l'últimu día pa poder participar nesti concursu