Berto García torna dos nueves obres de Lliteratura Infantil

"L'escritor asturianu presenta cola nueva editorial Cumio, dos nueves tornes de Lliteratura Infantil, Florenta, la gata poeta y Les fábules de Leonardo da Vinci.

Cumio, editorial con abonda esperiencia na edición n'otres llingües (castellán y gallegu), apaez agora nel panorama lliterariu n'asturianu al traviés de la torna de dos obres empobinaes a los primeros llectores, incluyíes por tanto na lliteratura infantil.
Con una edición mui curiada, esta editorial, nel so estrenu na nuestra llingua, úfrenos en, Florenta, la gata poeta, una riestra de poemes fabulaos escritos por Pilar Mayoralas y acompañaos con unos guapos dibuxos fechos por Mónica Cañete. Na segunda obra, Les fábules de Leonardo da Vinci, recuéyense delles de les fábules escrites pol polifacéticu artista italianu, acompañaes tamién con dibuxos bien prestosos, nesta ocasión fechos por Rossana Casano.

L'escritor Berto García, nacíu en Les Vegues, nel conceyu de Corvera nel añu 1995, ye autor de los poemarios: Ensin otra sida (2005), Treslallende (xunta Carlos Suari, 2007) y Manual contra'l vacíu, obra cola qu'algamó nel 2007 el Premiu Fernán Coronas. L'autor ye maestru interín d'Educación Infantil y Primaria, amás d'espertu en llingua asturiana, y anguaño pon clas nel C.R.A. OZCOS."