El Farho Xixón Baloncestu perdió n'Huesca

"JRM El Farho Xixón Baloncestu perdió na so visita a Huesca pol resultáu de 85 a 71 y con ello vuelven toles pantasmes que nortiaben enriba l'equipu xixonés.

La desventaya llegó a ser de diecisete puntos, 85 a 68, y namás qu'un xugador fizo un bon alcuentru, foi Matt Kiefer, que colos sos ventiséis puntos, seis rebotes, siete personales recibíes y los trenta y ún puntos de valoración -la meyor del alcuentru-, magar que pente la selmana foi'l que se negara a entrenar el llunes pela tarde, y recibir el sofitu de los sos campañeros, tres nun cobrar esti mes de marzu.

L'equipu aragonés foi superior a los asturianos dende l'entamu y un ex-xugador xixonés, Josep Ortega, fizo un gran partíu, metíendo-y al so antiguu equipu ventidós puntos. El Farho Xixón Baloncestu entonóse un poco nel segundu cuartu con un parcial de 4 a 20 y llogró ponese delantre nel marcador con un 27 a 34. Los locales voltiaron el resultáu y con un 17 a 4 llegóse al final del segundu periodu con un 44 a 38. Tres el descansu los xixoneses llegaron averase a cuatro puntos, 44 a 40, pero los aragoneses volvieron a marchase nel lletrónicu hasta los trece puntos, 55 a 42. Entá'l Farho Xixón Baloncestu llogró un parcial de 2 a 10 y llegóse a lo cabero'l tercer cuartu colos asturianos cinco puntos abaxo, 57 a 52.

Nel últimu cuartu los xixoneses llegaron a ponese a trés puntos, 59 a 56, pero ehí pilancó l'equipu asturianu y les ventayes locales foron enanchando la so ventaya y yá nun volvió amenorgase. Esti domingu a les siete vien a La Guía l'Illescas, un favoritu nidiu na llucha pol ascensu, nel que los asturianos pierden munches posibilidaes.

Ficha técnica:

CAI Huesca Cosarsa:
Federico Castelló (7), Marcandrew Antxon (12), Antonio Gómez (10), Josep Ortega (22) y Andreu Matali (12). Tamién xugaron: Daniel Rodríguez (14), Javier Bertrán (6), Llorens Mons, Aleix Prat y Nigel Wyatte.
Farho Xixón Baloncestu:
Rubén Suárez (5), Sony Vázquez (2), Curtis Bobb (4), Brandon Woolfram (6) y Matt Kiefer (26). Tamién xugaron: Adrián García (2), Chus Pineda (5), José María Balmón (11), David Jandl (7) y Logi Gunnarsson (3).

Árbitrios:
Antonio Manuel Zamora y Conrado Martín.

Nel Farho Xixón Baloncestu foi elimináu por cinco personales Adrián García y nel Huesca nun hebo eliminaos.

Partíu de la ventésima sesta xornada de la Lliga Adecco LEB Plata, xugáu nel Palacio Municipal de Deportes de Huesca.
Parciales per cuartos: 23-14, 21-24, 13-14 y 28-19."