L'estáu español, puerte d'entrada de los tresxénicos

La organización ecoloxista Greenpeace denunció güei, coincidiendo cola entrada en vigor de la nueva llexislación sobre etiquetao, qu'España convirtiose dende va unos años p'acá, nel puerte traseru pel qu'entren los tresxénicos a la Xunión Europea. En rueda de prensa Greenpeace esplicó qu'España ye l'únicu estáu de la XE que cultiva maíz modificao xenéticamente y qu'importada más de cuatro millones de tonelaes al añu de soya y maíz tresxénicos procedentes mayormente d'EE UU y d'Arxentina.

L'anuncia diola Greenpeace en Cartagena, onde ta acabante d'entamar una xira europea'l barcu de la organización MV Esperanza pa dar la voz d'alarma sobre esta situación. Xunta l'Esperanza, l'Artic Sunrise n'América y el Rainbow Warrior n'Oceanía van completar la campaña mundial contra los tresxénicos de Greenpeace.

Según la organización, l'añu pasáu el Gobiernu español consintió que convivieren colos demás cultivos 32.000 hectáries de maíz tresxénico "Bt", un maíz con xenes bacterianos que dan una proteína tóxica. Les más de les plantes d'esti maíz, que xeneró casos documentaos de contaminación según Greenpeace, son de la variedá Compa CB, de la multinacional Syngenta, una empresa pola que'l gobiernu del PP tuvo una preferencia que nunca nun escondió. Sábese que parte d'esti maíz plantóse n'Asturies, anque l'asitiamientu de la faza onde se punxo ye entovía un misteriu.

Losdatos de Greenpeace dicen qu'España importa cerca de nueve millones de tonelaes de soya y de maíz, de los que una metada correspuenden a cultivos tresxénicos. Amás d'importase cerca de cuatro millones de tonelaes de soya y mediu millón de maíz, Greenpeace denunció que los importadores españoles (Cargil, Bunge, Simsa, Interpec, Dreyfus o ADM, por poner dellos casos) contaminen les partíes al mecer lo tresxénico colo natural nes tolves y depósitos.