L’Alla recupera les obres completes d’Andrés Solar

Anque l'Academia de la Llingua Asturiana nun participa oficialmente na convocatoria de la Selmana de les Lletres Asturianes que fai la Conseyería de Cultura, la institución nun quixo tampoco escaecer a la figura d'Andrés Solar, l'escritor de Deva (Xixón) desapaecíu va facer agora 20 años y al que se dediquen esti añu los actos de la Selmana de les Lletres.

Ye por ello que l'Alla va asoleyar, coincidiendo con estes feches una nueva edición de les obres completes d'Andrés Solar, obra clave pa comprender la figura de "Andresu'l de Deva". Iguada por dos persones que lu conocieron y trataron abondo como foron Carlos Rubiera y Ramón d'Andrés, la edición de 1986 de les obres completes d'Andrés Solar lleva tiempu escosada de les llibreríes. Ente los relatos incluyíos nesta obra tan "Xuan y Xuanín", col que ganó'l II Concursu de Narraciones Curties de la preautonómica Diputación provincial "El milagru de la vara'l patriarca" y "En cuartu de siempre", ente otros

La narrativa d'Andrés Solar trata casi toa alredor del mundu de la infancia y la mocedá nun mediu rural que llucha col urbanu, pero como diz el críticu Xosé Bolado nel so artículu "Andrés Solar: la seducción prometeica" "nél la presencia de lo rural nun ye bucolismu nin continuación de la mena ruraliega sentimental (...) alita nos sos cuentos l'ánima d'un panteísmu que fai del home un ser en perfecta relación col so arrodiu. Tampocu hai mieu a mostrar los aspectos xabaces que la hestoria fo texendo ya calteniendo dende cuantayá neses fasteres de la sociedá asturiana". A xuiciu de Bolado esta actitú pa colo rural y el mundu de la naturaleza "sepártalu nidiamente d'aquellos escritores, xeneralmente urbanos, que describen l'aldea dende la so fantasía ciudadana".