"La sidra, como tien que ser"

"La Xunta pola Defensa de la Llingua entama baxo'l nome ""La sidra, como tien que ser"", una campaña de normalización llingüística empobinada al ámbitu hosteleru asturianu y, sobre manera, el mundu de la sidra.

La campaña, que será presentada oficialmente esti vienres en Xixón, enmárcase dientro de les actividaes que vien desarrollando la Xunta en favor de la normalización del asturianu en dellos ámbitos de la sociedá asturiana. Nesti casu, ""La sidra, como tien que ser"" faise en comuña cola propia Asociación de Llagareros d'Asturies, teniendo la intención de repartise'l cartel peles sidreríes asturianes más representatives.

La iniciativa sigue col mesmu lema que yá usara la Xunta pola Defensa de la Llingua na campaña qu'entamara hai dos años col repartu del ""Llibretín de la sidra"", onde se facía referencia al mundu de la sidra y de la llingua asturiana, señes d'identidá qu'en opinión de la Xunta ""nacieron y medraron xuntes"".

Nel actu de presentación, programáu pa les 18.00 hores nel Hotel ""Villa de Gijón"" van intervenir, amás de Xuan Gonzalo ""Eve"" en representación de la Xunta, José María Osoro, presidente de l'Asociación de Llagareros d'Asturies y José Luis Acosta, representante de l'Asociación del Barriu de la Sidra."