Vazquez ganó pela mínima

Juan Vázquez ganó les elecciones a rector na Universidá d'Uviéu por un marxe estrenchu de 152 votos ponderaos, una diferencia más pequeña de lo que se contaba al favor del actual rector, el primeru que ye a renovar cargu na institución na etapa democrática.

Tres de pesllar les urnes con una participación que pasó del 30% ente tolos estamentos universitarios, el recuentu, que pudo siguise en directu pela web de la Universidá, foi emocionante enforma. El fechu de qu'apaecieren ente los primeros recuentos los resultaos de Químiques, la facultá de Vicente López Gotor, entornó la llucha al favor del aspirante, pero Vázquez consiguió ponese pronto a la cabeza del recuentu, anque por un marxe siempre pequeñu.

Los resultaos d'Económiques, onde Vázquez xugaba en casa, afitaron el trunfu de Vázquez, qu'amás consiguió, a última hora, ponese per delantre de Gotor na votación ente los estudiantes, na qu'anduvo siempre per detrás nel recuentu. De cualquier manera, dende qu'apaecieren los votos de los profesores d'El Milán, Vázquez tuvo nes manes el trunfu (el factor de ponderación del votu facía que les papeletes de los profesores doctores contaren el 53% del total). Por campus, amás de n'Económiques, Vázquez trunfó en Ciencies, Pedagoxía, Sicoloxía, Medicina, Enfermería, Inxeniería de Xixón, Empresariales d'Uviéu, Bioloxía y Mieres, mientres que Gotor tuvo más votos nes dos facultaes d'Informática, Maxisteriu, Derechu, Xeoloxía, Mines, Inxeniería Técnica Industrial de Xixón, Rellaciones Llaborales y Marina Civil

El rector namás perdió claramente -5 puntos de diferencia con Gotor- ente'l personal alministrativu y de servicios, que se sabía d'antemano que taba mui mal a gustu col rector