L'Autovía Minera fai un añu

El llunes 29 de marzu, l'Autovía Minera cumple ún añu dende que s'abrieron tolos tramos, anque yá dende payares del 2.002 funcionaba'l trayectu ente Bendición y Xixón. Según datos oficiales del Principáu, una media de cerca de 12.000 coches diarios garraron esti añu la que ye la primer autovía de titularidá autonómica.

Concebida cuando la llexislatura de Sergio Marqués, l'Autovía Minera pasó per un llargu procesu de definición y obligó a unes obres enforma complicaes nes que'l presupuestu inicial de 33.000 millones de pesetes acabó por disparase hasta los cerca de 50.000 millones. Sicasí, la llarga historia de l'Autovía Minera entovía nun acabó. Queden por rematar los enllaces que faigan de l'AS-1 un camín amañosu pal tresporte pesáu per carretera, que nun pue aprovechala polos enzancos que suponen les salíes actuales, que tamién son una estorbisa pal tráficu de coches, sobremanera na salida pela Pola Siero. Los argayos y pisaes de la vía son otru de los cáncanos d'esta carretera, que tien poco menos qu'un récord de túneles, desmontes y pontes nos sos 34 kilómetros.

Los datos del primer añu de la minera demuestren que la carretera rexistra más coches los vienres, y el mayor picu de tráficu diose'l 10 d'agostu. La intensidá media del tráficu asítiase en cerca de 12.000 coches al día, anque lóxicamente los tramos per onde se mueven más coches son los que tan más allegaos a Xixón, onde la presencia de vehículos ponse nuna media de más de 14.098 coches per día nel tramu Mareo-Xixón. La rodiada de Llangréu tamién rexistra un picu curiosu de tráficu, con 13.599 coches nel tramu Llangréu-Bendición. Como ye de suponer, Mieres, que tien tamién conexón per autopista con Uviéu, emplega menos la Minera, baxando'l tráficu ente l'enllace de La Peña y el de Riaño a 10.002 coches al día.

Estos datos nun son precisamente pa tirar volaores. Va un añu, el Conseyeru d'Infraestructures Juan Ramón García Secades dixo, cola Autovía pa inaugurar que la previsión pa la Minera taba ente los 16.000 y 18.000 coches al día, con un promediu de 21.000 nel tramu ente Llangréu y Siero. Secades adelantó tamién daquella que, en trés años, la Minera podía ponese nuna media de 18.000 coches. De momentu, nun se llega nin a la primer estimación, anque casi qu'hai qu'agradecelo. Si pasar pasaren esos tráficos, los atascos na entrada a Xixón podíen ser de los que faen historia.