L'Academia presenta'l so Diccionariu "on line"

"L'Academia de la Llingua Asturiana presentó esti miércoles la versión del so Diccionariu na Rede, yá en serviciu dende xineru, que pue visitase na páxina web de la propia Academia. Na presentación tuvieron presentes la presidenta de l'Academia, Ana María Cano, el secretariu, Roberto González-Quevedo, asina como'l representante de la empresa de servicios informáticos Araz.net, Fernando de la Fuente, responsable de la ellaboración d'esta versión informática.

Nesti casu la la puesta en marcha del diccionariu vien acompañada de la versión ""on line"" de la Gramática y les Normes Ortográfiques de la Llingua Asturiana, nes sos últimes versiones. Amás, Ana Cano informó de l'actualización del Iguador, el correutor ortográficu que pue descargase tamién dende la mesma páxina.

Ana Cano recordó amás otres ferramientes ortográfiques que l'Academia tien espublizaos. Ente ellos taríen los Cartafueyos Normativos, instrumentos d'adautación de la norma llingüística al ámbitu social, alministrativu y en definitiva normalizador de la llingua. Asina Cano adelantó tar trabayando nun nuevu númberu con terminoloxía informática, nomes de países y ciudaes del mundu y terminoloxía hostelera.

"La normalización ye posible"

Ana Cano consideró que la puesta en funcionamientu d'estos servicios teunolóxicos son ""una ferramienta fundamental y un pasu perimportante pa la normalización y la normativización de la llingua asturiana"". Pa la presidenta de l'Academia ""ye claro que la llingua algama un nivel de desarrollu que fai posible que la oficialidá puea desarrollase ensin torgues téuniques"", afirmó. ""La normalización social ye posible y pue llevase p'alantre"", añadió.

Oficialidá

Cano refirióse tamién al actual procesu de reforma del estatutu, no que cinca a la cuestión de la reconocencia de la llingua asturiana, como demanda fundamental d'Izquierda Xunida-Bloque por Asturies-Verdes. ""Si nun s'aprueba la oficialidá, va desaprovechase una oportunidá única p'afitar la llingua, y los partíos demostraríen que nun tán a l'altura de los ciudadanos"", recordando que tal y como amuesen les encuestes sociollingüístiques ""la xente quier vivir nun futuru billingüe n'Asturies"".

""Ye mui difícil d'entender que la llingua que más peligru cuerre de desapaecer nel Estáu Español seya la que menos protección tien"", afirmó. ""Tien de ser posible que la llingua puea emplegase llibremente y ello sólo ye posible cola oficialidá"", afirmó.

Amás, esplicó que ""la oficialidá conllevaría namás la reconocencia nel Estatutu d'Autonomía, porque dempués tendría d'aprobase una llei de normalización na que quedaren conseñaos los plazos, presupuestos y demás cuestiones""."