Denuncien a HC por tapar un prau con povisa

El Seprona ta investigando una denuncia que punxo un vecín del pueblu de Bueñu contra la empresa Hidroeléctrica del Cantábrico. Ello ye que les emisiones del grupu I de la central térmica de Soto de Ribera taparon el prau del denunciante con una capa de dellos milímetros d'una povisa que vien casi seguro del grupu I de la térmica de Soto. Esti grupu, inauguráu en 1962, ye ún de los más vieyos d'Asturies, y HC namás lu prende qu'en casu d'emerxencia, pero ello foi que la térmica tuvo prendía esti llunes, soltando pela chimenea una "lluvia negro" que cayó nos praos de la rodiada.

Nun ye, nin con muncho, el primer episodiu de lluvia negro que produz la térmica vieya, y de momentu se ve traza de que vayan pesllala, polo menos hasta que se faiga la central nueva de gas que tien planeada la empresa. L'alcalde de La Ribera, José Ramón García Saiz
yá tien denunciao delles vegaes que'l Grupu I de la central suelta pela chimenea partícules de carbón, emporcando tola rodiada cada vez que lu prenden. Lo que sal pela chimenea de la térmica ye mayormente carbón molío que la central, polos fallos de funcionamientu que tien nun llega a quemar y que va axuntándose hasta que la planta suelta un montonáu d'ello d'una tacada pela chimenea.

Cataluña vivió hasta va dos años una situación apaecía colos episodios de "lluvia negro" de la central vieya de Fecsa-Endesa en Sant Adriá del Besós (Barcelona), pero los técnicos de la Generalitat cortaron pela freba mandando trancar el grupu contaminante en setiembre del 2.002.