Los ganaderos asturianos denuncien n'Uviéu la crisis del sector

"Les trés principales organizaciones agraries d'Asturies, COAG, UCA y Asaja, repartieron más de 2.000 llitros de lleche gratis na plaza la Escandalera, n'Uviéu, como protesta pola baxada del preciu a la productores. Dende les 12.00 hores cientos d'asturianos y asturianes ficieron cola pa recibir la lleche de baldre, amás d'una esplicación de los ganaderos sobre la crisis que ta pasando'l sector.

En declaraciones a los periodistes, los representantes sindicales alvirtieron que nestos momentos los ganaderos de lleche ""tán pasándolo verdaderamente mal"" yá que los costos de producción cuasi son los mesmos que'l preciu col que se vendi la lleche a la industria.

""Sobre manera lo que queremos ye tresmiti-y al consumidor que'l ganaderu nun ye'l que marca'l preciu de la lleche y poro, lo que queremos nun ye subir los precios"", esplicó'l secretariu xeneral d'UCA, José Calvo, qu'añadió que lo único que piden los ganaderos ye poder quedar con ""una pequeña parte del valor añadida al trabayu"". Asina, los sindicatos insistieron na fuerte xuba de los costos de producción - gasolina, piensos, fertilizantes, etc - sorrayando que ""los ganaderos nunca quixeron facese millonarios, nin muncho menos"". ""Queremos que los políticos se dean cuenta, d'una vez por toes, qu'ensin ganaderos y agricultores el mediu rural camudará nuna selva ensin valir dalu"", dixo Calvo."