Los llagares de sidra seleccionao cuenten tener la meyor producción de la historia

"La collecha de mazanes recoyíes ente ochobre y avientu del 2007, de sidra de mazana seleccionao, ellaborao con mazana cien por cien d'Asturies y controlada por una auditoría que certifica la so calidá, va ser la más abondante de la historia, algamando los dos millones de botelles, según informaron fontes del Grupu Trabanco al traviés d'una nota prensa.

Los seis llagares de mazana seleccionao (Sidra Trabanco, Foncueva, La Nozala, El Gobernador, Peñón y Muñiz) solicitaron a Aacomasi cerca d'un millón de contra-etiquetes de calidá. Nesti primer pidíu gástase, polo xeneral, un 50% de les contra-etiquetes que van utilizase en tola collecha y adelanta, poro, les espectatives de producción de los seis llagares.

La del 2007 va ser asina la collecha más abondante na historia de la sidra de mazana seleccionao y los llagares esperen que seya tamién la de mayor calidá y la de mayor proyeición internacional. De fechu, los llagares que producen sidra seleccionao participaron nel salón internacional d'alimentación y bebíes Alimentaria 2008, que se celebró en Barcelona del 10 al 14 de marzu. Nesi alcuentru, punxéronse en contautu con distribuidores d'Estaos Uníos, China y Rusia pa entamar a trabayar nes esportaciones de sidra de mazana seleccionao nestos países.

Dempués de facer les primeres prebes, los llagareros tán sacando les primeres conclusiones sobre les carauterístiques que va presentar la sidra de mazana seleccionao de la collecha 2007, comentando'l xerente de Sidra Trabanco, Samuel Menéndez Trabanco, que ""va ser una sidra mui compensao y mui uniforme, ensin picos de sabor"". Francisco Martínez Sopea, de Sidra El Gobernador, insistió na ""calidá"" de la sidra, sobre tou n'arumes y espalmáu"". Na mesma llinia, el xerente de La Nozala, Víctor Escalada, comentó que ""la collecha 2007 va dar una sidra mui intenso, con un tastu mui finu y una calidá mui bona"". Pela so parte, el xerente de Sidra Muñiz, Manuel Riestra, apuntó la posibilidá de que la nueva sidra seya de baxa graduación alcohólica, ""yá que la mazana recibió menos hores de sol de lo que ye vezu"".

Los seis llagares cuenten prebar la primer sidra del añu a finales de mayu o a primeros de xunu. Estes feches contrasten col ritmu de ventes de la collecha 2006. ""Les ventes subieron de manera espectacular y esti añu nun se notó'l tradicional paru nel consumu de sidra nos meses d'iviernu; esto va obliganos, seguramente, a adelantar la salida al mercáu de la collecha 2007, pa evitar l'ausencia de sidra de mazana seleccionao nes sidreríes"", comentó Samuel Menéndez Trabanco."