Apaecen seyes toliñes muertes nun día

La costa asturiana amaneció ayeri con dellos cetáceos varaos n'estremaos llugares. Según el Centru d'Estudiu y protección de les Especies Marines (CEPESMA), que recoyó los animales muertos, el primer exemplar, qu'atopó la Guardia Civil na playa de Tapia, yera un machu de toliña de 3 metros de llargo. Darréu d'ello, na playa de Xagó, en Gozón, un particular atopó un llobu marín pequeñu (1 metru y venti centímetros) que llegó viva a la playa. Siguiendo d'occidente a oriente, na primer escalera de la Playa de San Llorienzo en Xixón Salvamentu Marítimu atropó una toliña de 1,60 metros. Los servicios de salvamentu intentaron sacala del pedreru au l'alcontraron, pero l'animal yá taba muertu. Poco dempués recibióse una llamada del serviciu d'emerxencies 112 qu'avisaba d'otra toliña nel Arenal de Morís, en Villaviciosa. Na playa de Cueva, en conceyu de Valdés, vieron flotando otra toliña muerta, pero nun foron a allegase hasta'l cuerpu. Pa rematar la xornada, na playa de Moniéllo, en Castrillón, apaeció la última toliña muerta del día.

El CEPESMA recoyó tolos animales y llevólos pa la so sé en L.luarca, au va proceder güei a l'autopsia de les toliñes pa intentar dar cola causa que les llevó a toes a dir a morrer pa contra la costa. De mano, los responsables del centru tan estrañaos porque ye enforma raro que se dea un varamentu d'estes característiques, con seyes cetáceos muertos en poques hores na costa asturiana.