L'AXA presenta alegaciones al currículu de Bachilleratu

"L'Aconceyamientu de Xuristes pol Asturianu, al traviés del so secretariu Xurde Blanco Puente, acaba presentar alegaciones al recién aprobáu currículu de Bachilleratu, por considerar que ""inclumple los mandaos de la Carta Europea de les Llingües Rexonales y Minoritaries (ratificada por España nel añu 2001, BOE de 15 de setiembre) y de la Llei del Principáu d'Asturies 1/1998, d'usu y promoción del Bable/Asturianu"".

Asina, y tal y como yá ficieran colos Decretos que regulen la enseñanza Primaria, Secundaria, y el proyeutu d'Educación Infantil, presenten un escritu d'alegación empobináu al Conseyeru d'Educación del Principáu d'Asturies, José Luis Iglesias Riopedre.

Nél, el secretariu d'AXA acusa al conseyeru d'incumplir dos ""perimportantes cuestiones de rangu superior"", como seríen la inclusión de la llingua asturiana nel grupu de materies optatives ""incumpliendo l'artículu 8.1.c) de la Carta Europea de les Llingües Rexonales o Minoritaries, yá qu'España, acordies col so instrumentu de ratificación, comprometióse nella a ""disponer los medios pa una enseñanza secundaria garantizada nes llingües rexonales o minoritaries correspondientes"", pente elles ""les que los Estatutos d'Autonomía protexen y amparen nos territorios onde tradicionalmente se falen"", como ye'l casu de l'asturiana (artículu 4 de la Llei Orgánica 7/1981, del Estatutu d'Autonomía d'Asturies)"".

Al empar critiquen la imposibilidá d'usar la llingua asturiana como llingua vehicular nel desarrollu del procesu educativu, faciendo referencia a la promoción de la llingua que se conseña na llei autonómica. ""¿Qué usu de la llingua asturiana va promovese si nun se disponen los medios pal so emplegu vehicular na enseñanza?"" reflexona l'escritu.

D'otru llau l'Aconceyamientu de Xuristes critica'l criteriu de la Conseyería a la hora de desixir un númberu mínimu d'alumnos pa sacar alantre l'asignatura nos institutos, midida que dende'l so puntu de vista ""esfraya escontra'l mandáu al Principáu d'Asturies conteníu nos artículos 9 y 10 de la mentada Llei 1/1998, nel sen de que ""asegurará"" y ""garantizará la enseñanza del bable/asturiano en tolos niveles y graos"", ensin torga dala de númberu nin sometimientu a los petites (""criterios oxetivos"" los llama'l proyeutu) de dengún políticu""."