L'ALLA critica la denomación de la Ría del Eo propuesta pol Conseyu Superior Xeográficu

"L'Academia de la Llingua Asturiana, al traviés d'un comunicáu de prensa, espresa'l so descontentu cola denomación propuesta pola ""Comisión Geográfica Nacional"" del Conseyu Superior Xeográficu de Madrid, pa la Ría del Eo, considerando que'l nome ""Ría de Ribadeo"", en cuenta de la ""Ría del Eo/Ría do Eo"" propuesta pola Academia, ""xenera conflictu al favorecer inxustificadamente a una de les partes implicaes; en llugar d'atopar una solución de compromisu, favorécense les posiciones radicales.

L'Academia plantega que ""les razones históriques y llingüístiques esgrimíes dende Asturies paecen nun pesar un res cuando dende Madrid traten d'imponer una política que s'alluga, oxetivamente, al marxe de les bones razones y de la convivencia"".

Al empar caltién que ""la oxetividá y el bon xuiciu de la citada comisión, onde nun hai dengún representante asturianu, queda lloñe de ser modélica y recuerda tiempos de dómines pasaes, cuando pesaben más los intereses coyunturales y políticos que'l respetu a la tradición llingüística y cultural y al sentir de los mesmos ciudadanos"". Asina espresa'l so esmolecimientu pola asistencia a ""otra intromisión d'una política llingüística con un inequívocu enclín espansionista que non sólo nun busca acuerdos sinón que fai de la imposición llingüística la so norma avezada ensin el mínimu respetu a la vecindá, a la tradición oral y a los fechos impuestos por una realidá xeográfica compartida"".

Pa finar la institución académica fai un llamáu al Gobiernu del Principáu d'Asturies pa qu'actúe direutamente y s'oponga a una arbitrarierá tan clamorosa como la que denunciamos y fai alcordanza, una vegada más, de qu'esti y otros casos d'inxerencia inxustificada nun tendríen razón de ser si Asturies cuntara con una política llingüística real y con una llingua asturiana oficializada"" ."