L.lena va aprebar un Plan de Normalización del asturianu

El Conceyu va llevar a Plenu'l prósimu 23 de febreru, col sofitu unánime de la Comisión de Cultura, el Reglamentu d´usu del billingüismu, un testu que se presenta dende l'Ayuntamientu de L.lena como la garantía que l'asturianu va tar presente, a cualquier nivel, na totalidá de los servicios municipales. El documentu pretende igualar al asturianu y al castellanu en tolos testos oficiales y garantizar asina'l derechu de los l.lenizos a recibir nes dos llingües tola información municipal. Esta nueva midida, que se enmarca dientro de la política de promoción del asturianu que desarrolla l'Executivu local, ye un desarrollu del Serviciu de Normalización del Asturianu de L.lena que que dirixe Penélope Miranda dende va más d'un añu y que nació col oxetivu de poner en marcha iniciatives orientaes a normalizar socialmente l'asturianu nel conceyu y a esparder el so usu.

Precísamente hai agora esactamente un añu qu'entamó'l procesu pa llegar a esti reglamentu. El 14 de febreru de 2003 la propuesta presentóse na comisión de Cultura. El 3 de marzu los integrantes de la comisión dieron al Reglamentu l'apoyu unánime tres de delles modificaciones incorporaes pol PP. El 28 de marzu, aprobóse la redacción final del Reglamentu y remitióse a la Conseyería de Cultura pa que determinare la llegalidá del testu, qu'avaló finalmente la Oficina de Política Llingüística del Principáu, quedando yá namás pendiente de l'aprobación definitiva nel Plenu d'esti mes.

N'entrando a valir esti Reglamentu, tolos impresos y instancies que salgan del Ayuntamientu van ser billingües, lo mesmo que les invitaciones, comunicaciones internes y esternes, convocatories a reuniones, rótulos informativos de les instalaciones municipales y toles publicaciones institucionales (revistes, memories, guíes). El Reglamentu pretende tamién promocionar l'usu oral del asturianu por parte de los trabayadores municipales na rellación colos vecinos y nes intervenciones públiques, recoyendo'l compromisu del Conceyu de formar a los trabayadores nesti sentíu.