Fapas alvierte del riesgu que supón pa la supervivencia los osos la retirada de los restos d'animales muertos

"El fondu pa la proteición de los animales xabaces, Fapas, alvirtió-y esti llunes a la Xunión Europea sobre'l peligru que supón la so decisión de retirar la restos d'animales muertos de los montes, yá qu'obliga a los exemplares a una actividá permanente de busca d'alimentos, amás d'aumentar los daños nos ensames.

Pente medies d'un comunicáu de prensa, Fapas espresó qu'anque l'osu cantábricu suel abellugase nes cueves u oseres cuando llega l'iviernu, esti añu 2008 tien vistes delles oses ocupando los territorios más baxos del Cordal Cantábricu, manteniendo asina una actividá constante a la busca d'alimentu. Amás d'eses oses, que davezu van acompañaes pol esbardu, pudieron llocalizase durante tol iviernu osos adultos con una intensa actividá, percorriendo los montes pa poder alimentase.

Esti cambiu de comportamientu que lu fai mantenese activu tamién nel iviernu supón, según Fapas, un grave riesgu pa la supervivencia de los osos, yá que normalmente los plantígrados queden dormiendo nes cueves y poro, nun van pelos montes nun periodu d'intensa actividá cinexética.

Amás alvierten que les zones oseres cantábriques coinciden colos espacios nos que se faen pel iviernu batíes de xabalín, y la presencia de los osos nes époques ivernales podría suponer un riesgu perimportante pa la so supervivencia, yá que la posibilidá de qu'un cazador-y pegue un tiru pensando que ye un xabalín ye mui alta."