Bután vive les primeres elecciones, dempués d'un sieglu de monarquía absoluta

"Cientos de butaneses esperaben na tarde d'ayeri énte los colexos eleutorales pa votar nes primeres elecciones llexislatives que van suponer el fin d'un sieglu de monarquía absoluta y, seguramente, una mayor apertura d'esti país del Himalaya que lleva décades peslláu al esterior. ""Tamos mui contentos de votar, porque va a suponer una gran diferencia nel nuestru país"", comentaba una profesora de 28 años que llevaba hores esperando delantre de les puestes del colexu eleutoral. ""Tol mundu ta atristayáu al ver que'l rei dimite. Amamos a tolos nuestros reis"", declaraba pela contra un empresariu de 42 años, Kinley Penjor. ""Por embargu camiento que la democracia tamién va ser bona"".

Efeutivamente foi'l propiu monarca, Jigme Singye Wangchuck, el que dimitió, sofitando asina una transición hacia la democracia, y aparentemente a la escontra de la propia voluntá del pueblu de Bután. Les autoridaes foron les encargaes d'organizar delles demostraciones de votación pa que la xente comprendiera la filosofía de los comicios y asumiera cómo formase nun criteriu pa escoyer ente les dixebraes opciones.

Depués de les elecciones el rei cuenta siguir siendo'l cabeza del Estáu, teniendo sicasí'l Parlamentu poder pa demandar la so destitución con dos tercios de los votos. El Conseyu mediará ente'l rei y el Parlamentu en materia de seguridá nacional y soberanía."