Piden que nun se cacen más llobos

La polémica polos ataques de llobos a les ganaderíes de montaña, que los sindicatos agrarios dicen que tan causando perdes millonaries llevó'l mes pasáu a la Dirección Xeneral de Mediu Ambiente a organizar batíes pa menguar el númberu d'exemplares d'esta especie. La solución propuesta pol Principáu nun tien el preste del movimientu ecoloxista, que la ve una midida precipitada. Asina, la Coordinadora Ecoloxista pidió-y ayeri a la Dirección Xeneral que la guardería de montes nun proceda a la caza de llobos autorizada na parte de L.lena hasta que se constituya'l Conseyu del Llobu y valore la situación de la especie con un encontu científicu seriu que dea una idega de les midíes afayadices. Los ecoloxistes señalen que sobre'l llobu pesa una indefinición llegal en cuantes que la especie nun ye protexía nel Estáu, ello con selo na UE.



Nesta situación, les presiones ganaderes nun puen ser al paecer de los ecoloxistes l'únicu argumentu pa decidir si se cacen llobos o non, sobremanera cuando nos allegamos a periodu electoral, en que parez que'l tema del llobu resucita. Pa ilustrar los mitos sobre'l llobu los ecoloxistes ponen el casu del estudiu que se fizo en Somiedu, onde se demostró que'l llobu alimentábase mayormente de xabalinos, ayudando a controlar la espansión d'una especie que causa munchu dañu a les esplotaciones. Más datos. Los trabayos científicos dicen que'l dañu sobre'l ganáu depende más de cómo se cuide'l ganao que de la presencia de llobos. Los ecoloxistes entienden que munchos ganaderos, bien d'ellos prexubilaos y que faen competencia deslleal a los ganaderos que viven d'ello, dexen el ganao suelto y ensin vixilancia la selmana entera. Aparte d'ello, la falta de control sobre los perros tamién xenera un gran n&u;acute;mberu d'ataques. Otra cuestión aparte ye'l cobru de los daños, y ye que dependiendo d'au caiga la res la entidá que cubre'l dañu puue ser el Principáu, que paga mal y tarde, o Parques Nacionales, que tarda entovía más.



La Coordinadora, que tien conocencia de que l'añu pasáu cazáronse lo menos 16 llobos (el 10% de la población total), preguntó-y a l'alministración si sabe qu'incidencia tuvieron estes baxes nel dañu a la cuadra ganadera.