El Farho Xixón Baloncestu tarazó la riestra derrotes

"El Farho Xixón Baloncestu frayó la riestra derrotes que vinía sofriendo dende hai cuatro xornaes y ganó al Básquet Muro por un 98 a 80, resultáu que pon de manifiestu la superioridá asturiana. L'equipu xixonés entá ye sestu na clasificiación, pues los equipos que tenía delantre tamién ganaron nesta xornada.

L'entrenador local, Jorge Elorduy, salió reforzáu cola victoria, dempués de que'l Conseyu d'Alministración caltuviera l'enfotu nel técnicu y nun se xuntara'l llunes pa tratar el tema. El Básquet Muro nun foi a parar a los asturianos y al descansu yá perdía por quince puntos, 49 a 34. La mayor ventaya nel marcador foi nel últimu cuartu, con un 85 a 63. Nesti alcuentru los xixoneses sí se mostraron como un equipu y el trabayu colectivu y el tar metíos nel partíu foi determinante nel so trunfu. Un aspetu a destacar foi la superioridá local nel rebote, pues garraron 44 por 26 de los mallorquinos.

Gran partíu de Brandon Wolfram (fizo dobles figures -31 puntos y 10 rebotes-, dio 1 asistencia y tuvo una valoración de 38 puntos) y de Matt Kiefer (19 puntos, 7 rebotes, 1 asistencia y 23 puntos de valoración).

Ficha técnica:

Farho Xixón Baloncestu:
Rubén Suárez (7), Sony Vázquez (5) Curtis Bobb (5), Matt Kiefer (19), Brandon Wolfram (31).Tamién xugaron: Adrián García (6), Chus Pineda (6), José María Balmón (8), David Jandl (3) y Logi Gunnarsson (8).
Básquet Muro:
Jeffrey Bonds (8), David García (22), Leroy Cage (16), Manuel de la Casa (9) y Israel Pampín (8). Tamién xugaron: Pablo Giménez, Sergio Riera (1), Davide Montanaro (2), Javier Pampín y Antonio Cañellas (14).
Árbitros:
Juan Carlos Souto y Álvaro López.

Nel Farho Xixón Baloncestu nun hebo xugadores eliminaos por cinco faltes personales y nel Básquet Muro foi elimináu Israel Pampín.

Partíu de la ventésima quinta xornada de la Lliga Adecco LEB Plata, xugáu nel Palacio de los Deportes de La Guía.
Parciales per cuartos: 24-14, 25-20, 27-23 y 22-23."