Representantes del PP del Oriente súmense a los sofitos a Alicia Castro

"Representantes de Xuntes Locales del PP nel oriente asturianu punxeron-y esti llunes 24 de marzu nomes y apellíos al apueste que'l PP del Oriente fai por qu'Alicia Castro se presente a la presidencia del Congresu Rexonal del PP, compitiendo asina cola alternativa del actual presidente del partíu n'Asturies, Ovidio Sánchez.

Al traviés d'un escritu robláu por diferentes representantes del PP nel oriente y recoyíu por Europa Press, los autores piden-y públicamente a la ex diputada nel Parlamentu estatal, Alicia Castro Masaveu, la so participación como candidata a la Presidencia del Partíu nel próximu congresu, señalando que naide como ella conoz el ""sabor de la victoria"" y recordando que naide algamó nunca la suma de votos qu'ella llogró nes Elecciones Xenerales del 2004 n'Asturies. ""Yes, poro, una clara ganadora, dalgo necesario nel PP d'Asturies pa encarar un futuru positivu"", conseña l'escritu.

Recuerden tamién que'l pasáu 23 de setiembre, Castro anunció que daba ""un pasu p'atrás"" nes sos responsabilidaes polítiques. ""Güei pidímoste qu'esi pasu seya p'alantre"", comentaron. ""Alicia, sabemos que cuentes amás coles máximes garantíes de compatibilidá, confirmaes pol propiu Congresu de los Diputaos, pa poder compaxinar la to vida profesional y política"", señalen los roblantes, que dicen esperar ""con impaciencia"" ya ""ilusión"" la rempuesta de Castro, ufiertándo-y amás la so ""lleal collaboración de cara al futuru dende esti mesmu momentu"". Los roblantes comenten nel escritu que'l PP asturianu sufrió en poco más de nueve meses trés derrotes nes urnes, nes elecciones municipales y autonómiques del 2007, y nes últimes xenerales. Asina, califiquen el Congresu como ""básicu"" pal futuru del partíu y d'Asturies, animaos a echar ""el restu"" en nome de los más de 280.000 asturianos que-y dieron la confianza al PP col so votu. ""Tamos énte un retu de futuru que toos asumimos con arguyu"", y ""ye por ello que los representantes políticos que roblen esti escritu vamos trabayar con toles nueses fuerces p'algamar la máxima participación democrática nel nuesu Congresu, y a pocos meses vista"", dixeron. Añadieron qu'esa participación va producise dende la ""unidá"" y con un ""provechosu"" alderique internu.

Los roblantes del escritu son l'alcaldesa y presidenta de la Xunta Local del PP de Llanes, Rosa María Domínguez de Posada, y el secretariu de la so Xunta Local, Benito Fernández. Per parte de Ribedeva, apaez el presidente de la Xunta Local, Juan Carlos García González, y el voceru municipal, Enrique Fuentecilla. Tamién firmaron l'escritu'l Presidente de la Xunta Local del PP y voceru municipal, Fidel Sánchez Gómez, asina como l'ex alcalde de Ribesella, José Miranda. Per parte de Cangues d'Onís, apaecen el voceru municipal Santiago Pendas, asina como los miembros de la Xunta Local Elpidia Quintana, Javier Blanco, María Teresa Fernández y Roberto de la Vega. Pa finar, roblen l'escritu en Piloña, l'ayalgueru de la Xunta Local, Luis Antonio Azcoitia, los conceyales Gloria Llano y Rubén Sánchez, asina como la secretaria de Nueves Xeneraciones, Ángela Arena.

Al sofitu del PP del Oriente hai que sumar la intención del PP d'Occidente de lleer el so propiu manifiestu de sofitu a Castro, dempués de la Xunta que teníen programada pa esti llunes na Casa Cultura de Tapia. Los miembros de les Xuntes Locales del Occidente Asturianu amosaben asina'l so apoyu a la futura candidatura d'Alicia Castro a la presidencia del Partíu."