Asturianos nun conciertu históricu n'Escocia

HARVEST, Royal Concert Hall, Glasgow, 14/01/04. Crónica d'Igor Medio

La presente edición del prestixosu festival Celtic Connections inaugurose'l
pasáu miércoles 14 de xineru nel Royal Concert Hall de Glasgow col
conciertu Harvest (collecha). L'espectáculu, un proyectu del músicu escocés
Donald Shaw (perconocíu pol so trabayu col grupu Capercaille), lleva esti nome
en referencia a los brillantes músicos mozos escoceses que van
surdiendo ininterrunpidamente dende va una década en toles partes
d'Escocia, y algamando una calidá ensin precedentes gracies a iniciatives
como'l movimientu "Feisan de les Highlands" y les escueles de música de sitios como
Edimburgo o Glasgow. D'esta collecha de mozos y moces virtuosos féxose una
selección d'80 mozos y moces d'edaes ente 12 y 21 años, creando una
auténtica orquesta compuesta por secciones de vigulinos, cellos, curdiones,
small pipes, whistles, xiblates, guitarres, bouzouki, saxu, pianu, voces y
una banda de gaites escocesa al completo. Dirixía con mano mayestra pol
músicu escocés Donald Shaw, ésti incorporó amás un repartu estelar de
músicos de les naciones celtes europees (Escocia, Breizh, Eire, Galicia,
Asturies), col ánimu de xunir l'amplia escena folk europea cola próxima
xeneración de músicos escoceses.


Escocia taba enforma representao: amás de Donald Shaw, que nun dio a bastu
ente la dirección de tal bandona y la so propia execución a la curdión,
piano y teclaos, taben presentes otros Capercailles como Karen Matheson
(voz), Charlie McKerron (vigulín) y Ewen Vernal (contrabaxu), que xunto con
James MacIntosh (batería y percusión) punxo la solidez y seguridá necesaries
pa construyir les bases rítmiques de semeyante 'dinosauriu' musical. La base
rítmica completáronla Soïg Siberil (guitarra) y Gilles le Bigot (guitarra)
de Breizh, Guillermo Fernández (guitarra) de Galicia y Ígor Medio (bouzouki)
d'Asturies. Como solistas destacaron Michael McGoldrick (flauta y uilleann
pipes) d'Inglaterra/Eire, Jean-Michel Veillon (flauta) de Breizh, Gerry
O'Connor (banjo) d'Eire, Xose M. Budiño (gaita galega) de Galicia y Jose M.
Tejedor (gaita asturiana y low whistle) d'Asturies. Nel apartáu vocal, a los
xóvenes cantantes escoceses xuntáronse los impresionantes Denez Prigent de
Breizh, Karan Casey d'Eire, Guadi Galego de Galicia y el cantante asturianu
Chus Pedro.


En dalgo menos de tres hores, el público de Glasgow pudo disfrutar d'un
repertoriu d'una variedá y calidá como poques veces da en xuntase nun
escenariu. Les pieces instrumentales foron estremaes: un carráu d'elles
compuestes por Shaw y otros solistes como McGoldrick, Budiño o Tejedor;
delles otres tradicionales del folklor de los países convocaos, y toes
xuntaes en sets preparaos pa la ocasión polos músicos en dos díes d'ensayos
previos.


El conciertu entamó con un cantar a capella de la más piquiñina del grupu,
la neña escocesa Emma, siguío d'una versión bien sólida d'una Gavotte
bretona cola que se presentó tola banda. Ésta pieza dexó perclaro'l saleru
y la calidá qu'atesoraba la sección moza de la orquesta, que nun fadría más
que meyorar en cada tramu del conciertu. Temes como'l set Famous Last Words
(composición de Shaw so ritmos irregulares), los reels a mediu tiempu de
Tiree Girls, les xigues d'Aurora, Setestrelo (guapísimu cantar compuestu por
Galego/Fernández pal so grupu Berrogueto) o'l poderosísimu E Garnison de
Prigent marcaron la diferencia. El repertoriu asturianu tuvo representáu
poles Muñeres d'Avilés y Etna de J. M. Tejedor, y los cantares
tradicionales asturianos del últimu discu de Chus Pedro, Baxé al camín de La
Pola y Verdiciu, arrancho ésti últimu qu'entusiasmó al públicu del Concert
Hall. Dellos solos de J. M. Veillon, Karan Casey o Denez Prigent dexaron
claro la calidá individual de los músicos ellí presentes y terminaron
d'ablucar al personal.


Como'l caberu bis, los músicos improvisaron un set combináu con entraes y
salíes d'instrumentos estremaos: entamu xeneral con un reel clásicu escocés,
solu de flautes, solu de vigulinos, solu de banjos (Gerry O'Connor y una
neña de non más de 17 años marcáronse un mano a mano dignu de Dueling Banjos
que plasmó hasta a los músicos que los arrodiaben), un vertixinosu set
astur-galegu (Saltón central axuntáu a Aires de Pontevedra, interpretáu
polos músicos asturianos y galegos a dos gaites, bouzouki y guitarra), y
vuelta al reel escocés pa rematar con tola banda.


Harvest foi un acontecimientu estraordinariu, pola so calidá pero
principalmente pola so esclusividá. Nunca, que tengamos constancia, nun se
fexo nada d'esta mena y proporción nun conciertu de música folk. Donald Shaw
asumió un riesgu superlativu -y equí radica la grandeza del retu-
organizando un espectáculu de cientu cincuenta minutos con un repertoriu
inéditu na so práctica totalidá, protagonizáu por músicos mozos y inespertos
procedentes d'escueles estremaes, cola presión de tocar na apertura del
festival más importante, nel escenariu más imponente, y arrodiaos por
músicos que son el so auténticu referente musical. Había non poques duldes
acerca del resultáu; afortunadamente pa Shaw -y pa la música folk en
xeneral- la xugada salió-y redonda. Harvest foi un completu ésitu, y daqué
pa tener en cuenta de cara a posibles iniciatives asemeyaes nel folk
internacional en xeneral y asturianu en particular. Depués de superar con
creces la so prueba de fueu, la nueva xeneración de músicos escoceses yá ta
equí. Y vienen pa quedar.