L'antorcha Olímpica prende nun ambiente de protesta

"El prendíu de l'antorcha olímpica llevóse a cabu esti llunes na vieya ciudá d'Olimpia, en Grecia, dempués de que manifestantes pro - Tibet tentaren torgar la ceremonia que marca l'entamu del percorríu de la llama olímpica hasta Beijing, onde esti branu se celebren los Xuegos Olímpicos.

L'actriz María Nafpliotou foi la encargada de representar el papel de suma sacerdotesa y prender l'antorcha delantre del Templu d'Hera. Por embargu, enantes de qu'esto pasara dientro del recintu arqueolóxicu qu'acueye los restos de l'antigua Olimpia, un grupu de manifestantes intentaron pasar pol control policial cola pancarta cola que finalmente fueron a averase al direutor de los Xuegos Olímpicos de Beijing, Lui Qi, mientres que pronunciaba'l so discursu delantre de cientos d'autoridaes.

El manifestante que s'asitió delantre de Qi yera un home de de 48 años y nacionalidá tibetana, que foi arrestáu xunto a otros trés homes, demientres qu'otros 25 manifestantes fueron conteníos pola fuerte presencia policial y nun pudieron llegar hasta'l llugar.

Liu, que nun s'alteró una pica durante la protesta, dixo que ""la llama olímpica va unviar lluz y felicidá, paz y amistá, y esperanza y suaños al pueblu de China y a tol mundu"".

El deportista griegu Alexandros Nikolaidis, ganador de la medaya de plata en Taekwondo n'Atenes 2004, ye'l primer portador de l'antorcha nel so relevu de seis díes por Grecia, enantes de facela llegar a les autoridaes chines el 30 de marzu. ""Espreso equí la esperanza de que'l símbolu de l'antorcha seya reconocíu por tol mundu y se xeneren les circunstancies afayadices pa que se conoza"", aseguró nel so discursu'l presidente del Comité Olímpicu Internacional, Jacques Rogge."