L'Aguañaz ta grabando un discu de rock n'asturianu

El proyectu "Rock 'n Llingua" que quier xuntar a les nueves bandes que tan faciendo rock n'asturianu va garrando cuerpu cola grabación estos díes de los cantares del discu compilatoriu.

Falamos con Xune Elipe Raposo, ún de los responsables de la discográfica "L'Aguañaz", sobre la grabación d'esti discu de bandes que tienen al rock (o al folk-rock, o al hardcore) y al asturianu como ferramientes d'espresar la so música. Les bandes que tan grabando son "Skontra", "Güerku", "Falcatrua", "Oi! n´ast", "Milicia Astur" y "La Tarrancha".

Comentanos Xune les bones maneres que tan amosando les bandes nestes sesiones de grabaciones. Lletres más trabayaes, composiciones feches curioses y n'asturianu faenos albidrar un bon resultáu de producción, que ta en manes de Sergio Rodríguez cola ayuda de Xune Elipe. Tamién quier destacar el cantante de "Dixebra" la revelación nestos grupos de la gaita como un instrumentu de rock más, y que ruempe coles llendes estilístiques a les que tamos acostumaos nesti instrumentu. Y tou ello en bandes onde rescampla la so mocedá, yá que nenguna d'elles tien más de tres años. Esti datu pue llevanos a pensar que pue tar cuayando, anque pequeña, una escena de rock n'asturianu que venga a xuntáse a los veteranos "Dixebra".

Tovía vamos tener qu'esperar pa poder sentir los cantares d'esti discu en preparación, pero si ta claro que ye un apueste p'amosar al públicu asturianu nueves bandes de música fecha n'Asturies y n'asturianu y que tienen que buscar el so espaciu .