Ramón d'Andrés yá ye director de política llingüística

Dende'l martes 13, Ramón d'Andrés yá ye oficialmente Director de Política Llingüística del Principáu. El profesor y acdémicu entró güei por primer vegada yá como titular del cargu nel so despachu de la Cai Sol d'Uviéu, dos meses y mediu dempués de la so presentación pública, que se fizo'l 27 d'ochobre del 2.003.

N'aquella presentación d'ochobre, Ramón d'Andrés definió'l so llabor como'l de la dignificación social del asturianu al traviés d'oxetivos realistes que preparasen el camín pa una futura oficialidá. P'algamar estos oxetivos realistes, d'Andrés propunxo como base'l Plan de Normalización Sociollingüísticu, que se comprometió a presentar enantes de qu'acabare esti cursu políticu, ello ye, enantes del veranu del 2.004. Ente les llinies mayestres del plan, d'Andrés apuntó trés d'elles, como diben ser la modificación de los curricula, l'actuación en toponimia, afalar el so usu nos medios de comunicación y la normalización n'alministracion. Según reconoció entós d'Andrés, nesti llabor van ser precises la collaboración de l'Academia de la Llingua Asturiana y de la Universidá d'Uviéu.



Ramón d'Andrés nació en Madrid en 1959. Fíu del
conocíu escritor n'asturianu Manuel d'Andrés
Fernández"Mánfer de la Llera" d'Andrés ye Doctor
en Filoloxía Hispánica pola Universidá d'Uviéu.
Profesor de Llingua Asturiana na Escuela de Maxisteriu ente 1985 y 1998,
anguaño ye profesor titular na Facultá de Filoloxía de
Universidá d'Uviéu. Académicu de númberu de
l'Academia de la Llingua Asturiana, foi secretariu d'esta entidá hasta
que les diferiencies cola llinia d'actuación de la dirección de
l'Alla lleváronlu a dexar les sos responsabilidaes más directes
pa con esta institución, siendo públiques les sos discrepancies
cola Academia, de la que sigue siendo miembru.



Ramón d'Andrés ye autor d'una bibliografía bayurosa sobre cuestiones
filolóxiques, bien de vegaes con llibros de calter divulgativu y empobinaos a un
públicu ampliu, como "Cuestiones d'Asturianu Normativu"
o el "Diccionariu temáticu asturianu" anque la so obra
más prestixosa ye la conocía "Llingua y xuiciu : Sobre
delles cuestiones básiques del debate llingüísticu
n'Asturies" cola qu'algamó'l premiu d'ensayu Fuertes Acevedo en
1.998. La so abondante collaboración cola prensa entamó cuando
d'Andrés se fizo cargu de la sección n'asturianu "Alitar
Asturies" nel periódicu El Comercio, y collaboró col
selmanariu Les Noticies y con Asturies.com cola so columna "Bilordios
Filolóxicos" que trataba cuestiones divulgatives sobre l'usu
correctu del idioma.