16 hores ensin corriente

Dellos conceyos del occidente d'Asturies entamaron l'añu con un corte de corriente que perpasó toles llendes de lo que se tien por normal nestes averíes. El corte de corriente entamó a les 20,50 hores del día 2 de xineru y duró hasta les 14 hores del 3, dexando ensin suministru a Grandas de Salime, Santalla, Vilanova y Samartín d'Ozcos, Pezós y parte d'Allande. Dempués d'estos socesos, la Unión de Consumidores d'Asturies va pedi-y al Principáu que-y abra un espediente de sanción a la empresa que furne de corriente a la zona afectada, Electra del Viesgo. Al dicir de la UCe, el corte valta l'artículu 60 de la Llei del Sector Eléctricu, que califica d'infracción mui grave "la interrupción o suspensión del suministru de enerxía elléctrica pa una zona ensin que medien los requisitos llegales que lo xustifiquen".

La UCE y los conceyos afectaos solicitaron-yos a los vecinos que presenten denuncies particulares polos daños que sofrieren pa poder peritalos y pidir les indemnizaciones precises.