Asturies entama'l desarrollu de la Llei de Calidá

El sindicatu d'enseñanza SUATEA denunció güei que la Conseyería d'Educación ta entamando a aplicar la Llei de Calidá de la enseñanza n'Asturies. La organización sindical alvirtió que la Conseyería que dirixe Agustín Riopedre ta mandando-yos a les escueles proyectos de decretos rellacionaos cola xornada escolar, el nomamientu de directores de centros, normatives sobre atención a alumnáu con necesidaes específiques y otres materies. la Conseyería taría tamién convocando a dellos d'estos centros pa facer xuntes informatives sobre estes disposiciones que'l gobiernu asturianu cuenta con dir echando a andar.

A los representantes de Suatea estraña-yos que'l Principáu tenga tanta priesa por desarrollar la LLOCE cuando falten dos meses pa unes elecciones xenerales nes que, casu de ganar el Partíu Socialista, que ye'l que gobierna n'Asturies xunta Izquierda Xunida, tendría de retirase esta llei, como prometen dambes fuerces en programa electoral. Al paecer del Suatea, la llei de calidá ye una norma regresiva y antidemocrática, polo que-y abulta que'l Gobiernu asturianu tien obligación de facer tolo que pueda pa que nun se llegue a aplicar n'Asturies.