Mediu Ambiente organiza unes xornaes sobre xestión forestal

"La Conseyería de Mediu Ambiente y Desarrollu Rural organizará, ente finales de marzu y el mes d'ochobre, nueve xornaes formatives sobre la xestión forestal y los tratamientos silvícoles del pinu del país y del pinu ""insigne"", p'ayudar a los propietarios particulares y conciencialos sobre l'usu racional y sostenible del monte.

El programa ta formáu por clases teóriques y práctiques dientro d'un gran campu de conteníos, como la prevención de les quemes forestales. Les xornaes, que van pela segunda edición, van celebrase nos conceyos de:Tinéu, Valdés, Cangas del Narcea, Grandas de Salime, Xixón, San Tiso d'Abres, Eilao, Llanes y Uviéu.

Según esplicó'l Director Xeneral de Política Forestal, Cristino Ruano, esti tipu de xornaes valen pa meyorar la xestión de los montes pente medies d'un usu racional y sostenible, ufiertando les ferramientes que puen usase nuna zona onde los suelos y les condiciones climátiques favorecen la producción forestal"". ""Somos conscientes de la necesidá d'esparder estes téuniques ente los particulares de finques forestales, polo que la Conseyería decidió organizar estes xornaes que van pasar por dellos conceyos d'Asturies"", esplicó Ruano.

Los interesaos en participar nestes xornaes puen informase y cumplimentar la inscripción nes oficines comarcales de la Conseyería de Mediu Ambiente y Desarrollu Rural. A los asistentes se-yos entregará un certificáu d'asistencia y un Manual Básicu de Silvicultura."