La llei va obligar al pieslle de les térmiques de carbón asturianes más vieyes

La central térmica d'Hidrocantábrico en conceyu de La Ribera va tener que trancar los sos dos grupos más vieyos polos sos efectos contaminantes, mientres qu'Iberdrola va facer otru tanto col grupu 3 de la térmica de Lada. Los trés grupos van acoyese al Plan de Pieslle del Ministeriu d'Industria, según se supo per una rempuesta del gobiernu al diputáu d'Izquierda verde en Congresu Joan Herrera.

El plan d'Industria, que va afectar a un total de 23 centrales térmiques d carbón y de fuel-gas en tol Estáu, da permisu pa que l'actividá d'estos grupos siga ensin pasar de les 20.000 hores totales de funcionamientu d'equí hasta l'añu 2015, anque ye de prever que munches tean yá trancaes nel añu 2013. Ello ye asina pa que l'estáu Español puea cumplir la directiva europea qu'apauta los topes na emisión d'óxidu de nitróxenu, partícules y dioxidu d'azufre nestes instalaciones.

La normativa europea afecta tamién a otres 43 centrales que van siguir abiertes pero que van tener que facer inversiones pa menguar les sos emisiones contaminantes. Nes 23 que van trancar, les empreses titulares de les mesmes llegaron a la conclusión de que nun-yos traía cuenta dende'l puntu de vista económicu. Ello ye evidente sobremanera nel casu de los dos grupos vieyos de La Ribera, dos centrales inauguraes nel añu 1962 y 1967 respectivamente, que tienen el so ciclu de funcionamientu yá mui amortizáu y que tienen potencies pequeñes en comparanza con centrales más modernes (67 mw pal grupu I y 254 pal II). El mesmu alcalde de La Ribera lleva años pidiendo'l pieslle d'estos grupos, responsbles de l'alta contaminación atmosférica que se da nel conceyu.


Nel casu de Lada III, que s'abrió nel añu 1967 y que tien 156 mw, el pieslle d'esta central de yá s'anunciare en mayu del añu 2003, siendo la intención de la empresa espurrír la vida útil de Lada IV (358 mw) y pesllar Lada III, que va sostituyise por un grupu nuevu, Lada V, que va ser de ciclu combináu a gas anque la empresa anunciare de mano que diba ser de carbón.