Amnistía Internacional denuncia les graves violaciones de los Drechos Humanos n'Iraq

"La organización humanitaria Amnistía Internacional asegura que dende la invasión entamada por Estaos Xuníos n'Iraq, de la que se cumplen cinco años, ""toles partes vienen cometiendo graves violaciones de los Drechos Humanos, ente ellos crímenes de guerra y crímenes escontra la humanidá"". Según la organización, anque ""naide conoz"" el númberu concretu de víctimes, un informe d'entamos d'añu falaba de 151.000 muertos ente marzu de 2003 y xunu de 2006, anque reconoz que dellos informes suben esta cifra hasta los 600.000.

Amnistía Internacional denuncia que ""cientos de persones muerren cada mes pola constante violencia, demientres que'l númberu de vides amenazaes cada día pola probitú y los cortes d'electricidá, suministru d'agua, alimentos y asistencia médica nun pue calculase"".

D'otru llau ""la violencia escontra les muyeres y les neñes ta xubiendo"" y ""l'odiu ta dixebrando a les families y los vecinos qu'apocayá vivíen xuntos y en paz"". Según Amnistía, ""a la escontra de les afirmaciones que caltienen que la situación de seguridá ta meyorando nos caberos meses, la situación de los Drechos Humanos ye alloriante"". ""Los grupos armaos, tanto los apuestos al Gobiernu Iraquí a la Fuerza Internacional encabezada por Estaos Xuníos, como les milicies que pertenecen a los partíos políticos chiíes, siguen secuestrando, torturando y asesinando a civiles"", asegura la organización.

L'informe tamién denuncia que ""cuasi 60.000 iraquíes foron deteníos poles fuerces de seguridá y pola Fuerza Internacional"", los más d'ellos ""encarcelaos ensin cargos nin xuiciu"". Nos caberos meses, les fuerces d'Estaos Xuníos ""vienen matando a decenes de civiles"", ensin que s'espublice ""nenguna estadística cola muerte d'esa xente""."