Alicia Castro podría da-y el relevu d'Ovidio Sánchez

"Dirixentes locales de diferentes xuntes del Partíu Popular espresen la so intención d'apoyar una candidatura a la presidencia del partíu n'Asturies encabezada pola ex diputada nel Congresu, Alicia Castro, según publica esti miércoles el diariu La Nueva España. La candidatura de Castro diba competir asina cola d'Ovidio Sánchez, presidente del partíu n'Asturies, que yá anunciara la so intención d'aspirar a la reeleición. Dambes candidatures seríen presentaes nel congresu del partíu, que tendrá llugar na seronda.

Alicia Castro ganó les elecciones xenerales del 2004 n'Asturies y foi una de les diputaes más actives nel Congresu a lo llargo la pasada llexislatura, con un altu númberu d'iniciatives. Nel mes de setiembre anunció la so retirada de la política activa señalando que'l partíu necesitaba una ""renovación"". Un sector ampliu de los militantes llamentó aquella decisión, que los garró per sorpresa. ""Nun marcho del Partíu Popular"" foi, por embargu, una de les frases que pronunció Alicia Castro na rueda prensa na qu'anunció la so retirada, sorrayando que namás yera ""un pasu p'atrás""."