Migoya enfótase en qu'Easyjet va entamar la conexón con Berlín no que queda d'añu

La conseyera de Turismu Ana Rosa Migoya xustificó que la conexón con Londres que tien Easyjet dende l'aeropuertu de Ranón mengüe provisionalmente del 30 d'ochobre en p'alantre de siete vuelos a la selmana a namás cuatro polos problemes pa que la compañía asuma los servicios d'abastecimientu de los aparatos en tierra y l'autohandling del pasaxe, qu'hasta agora-y daba AENA. P'Ana rosa Migoya ello ye un problema "coyuntural" y enantes de qu'acabe l'añu Asturies va tener amás conexón con Berlín en cumplimientu del alcuerdu cola aerollinia inglesa, venceyáu a un alcuerdu de propaganda por importe de 576.000 euros nel exerciciu 2005 que punxo'l gobiernu asturianu pa que la empresa aerea ficiere campañes promocionales d'Asturies nel Reinu Uníu, una cantidá que s'anunció que va menguar en proporción al númberu de vuelos que retire Easyjet. La Conseyera de Cultura reconoció qu'el númberu d'estranxeros que visitaron Asturies xubió un 65 % nel mesd'agostu gracies a la presencia de la llinia d'Easyjet con Londres.