Avilés celebró la xornada de los servicios de normalización nos conceyos

Los responsables de normalización de la lingua nos conceyos d'Asturies conseñaron que los avances qu'ellos puean facer dependen de la voluntá política de cada equipu de gobiernu. IAS condenó la celebración de la xornada , que calificó de "marafundiu"

Avilés acoyó esti sábadu los I Alcuentros de los servicios locales de normalización llingüística, una xornada de trabayu na que los responsables de les nueve oficines locales de normalización de la llingua asturiana que funcionen agora mesmo n'Asturies manifestaron una realidá común como ye la falta d'una intencionalidá normalizadora clara en munchos de los conceyos pa los que trabayen, dándose una situación na que la posibilidá d'avances reales na normalización queda al criteriu de la voluntá política del equipu de gobiernu de turnu, una realidá a la qu'hai qu'amestar según comentaron los titulares de les oficines con menos dotación económica, la falta de medios y la precariedá llaboral en que se ven obligaos a trabayar en munchos casos, con contratos a tiempu parcial y ensin tener garantizada una estabilidá tan siquiera a mediu plazu.

El primer teniente d'alcalde d'Avilés, Fernando Díaz Rañón (IX-BA) abrió la xornada enxertándola nun debate políticu de distintu alcance al pidir un mayor nivel d'autogobiernu p'Asturies y defendió l'asturianu como una seña d'identidá común a tolos asturianos. Pela so parte, el director de Política llingüística Ramón d'Andrés defendió la utilidá de la Rede d'oficines de Normalización nos conceyos como ún de los avances en materia de normalización que se dieron nesta llexislatura y espresó la posibilidá de que l'asturianu pueda avanzar nel terrén de la normalización anque nun esista un marcu d'oficialidá, marcu que sedría el deseable pal titular de Política Llingüística.

La Rede de Normalización Llingüística Municipal, que nació nel añu 2004 col oxetivu de descentralizar y comprometer a les alministraciones locales nel envís de normalizar sociollingüísticamente, tien anguaño 9 entidaes asociaes: Xixón, Avilés, Siero, Llangréu, Mancomunidá de la Comarca la Sidra, Mancomunidá del Cabu Peñes, Cangas del Narcea, y L.lena son los nueve conceyos y organismos supramunicipales que la faen, representando a trece conceyos nos que viven más de 550.000 habitantes, dalgo más del 50% de la población del País.

La celebración de les xornaes mereció la crítica d'Izquierda Asturiana (IAS). El partíu d'izquierda nacionalista dixo nun comunicáu de prensa que la xornada d'Avilés forma parte d'una política que ye en realidá de "metanormalización" un términu qu'IAS identifica como "una nueva y fraudulenta disciplina desconocida pa los expertos, y que triunfa nes instituciones asturianes consistente en falar sobre lo qu'hai que facer. Un fechu loable pero que desgraciadamente na mayoría de les ocasiones nun vien acompañáu de la puesta en marcha de midíes efectives". L'agrupación política denunció qu'organizar xornaes como esta supón una "auténtica falcatrúa a la ciudadanía" asegurando que nello "úsase'l dineru de los contribuyentes, nesti casu miles de euros" y ello "non n'aplicar midíes que creen derechos o que camuden les práutiques de l'alministración, sinón n'actuaciones efímeres que puen ser materia de titular, pero que nun dexen un posu qu'incida na normalización real de la llingua asturiana". Nun durísimu comunicáu IAS asegura que "Anque hai oficines de normalización (...) l'asturianu nun tien apenes presencia na mayoría de los conceyos asturianos y los presupuestos nun s'utilizen pa realizar una verdadera normalización de la llingua, pola ausencia d'una verdadera voluntá política, sinón qu'esti tipu d'actos sólo valen pa que "los del bable" s'aconceyen, gasten les perres en vese les cares unos a otros y pa que den la parpayuela." Asegurando que "Con estes xornaes, asistimos a l'antítesis de la normalización del asturianu". El partíu que representa Inaciu Llope yá se pronunciare en términos asemeyaos con motivu d'otres xornaes que tuvieren llugar l'añu pasáu en Xixón.