Izquierda Xunida recueye firmes escontra'l Sistema Electoral

"Izquierda Xunida acaba poner en marcha una ""Campaña de recoyida de Firmes"" pa reclamar la creación nel Congresu los Diputaos d'una Comisión Parlamentaria qu'encare la reforma del Sistema Electoral que funciona anguaño. La campaña, que lleva'l nome de ""Por una Llei Electoral Xusta y Democrática"", supón la primer fase d'una serie d'iniciatives que cuntarán con convocatories de movilizaciones de los partidarios d'una ""necesaria reforma qu'asegure la proporcionalidá na representación parlamentaria venceyada al númberu de votos algamáu por cada fuerza"". Nun primer momentu toles persones que quieran sumase a la campaña, puen aportar la robla na páxina web d'IX. Dempués, la idea de la formación ye ampliar los medios d'apoyu pente medies de les federaciones que componen IX, asina como asociaciones y colectivos que tán d'alcuerdu cola propuesta.

Izquierda Xunida vien pidiendo dende hai más de 22 años la igua d'un sistema electoral creáu durante los primeros años de la transición democrática. L'oxetivu orixinal yera crear mayoríes estables arriendes de les formaciones más votaes, ayudar a la gobernabilidá énte un mapa políticu desconocíu dempués de cuatro décades de dictadura y evitar d'esti mou la dixebra del Parlamentu nun conxuntu de formaciones que naquel momentu tuvo la denomación de ""sopa de siegles"".

Por embargo, esti sistema electoral paez apurrir un modelu inxustu pa les formaciones como Izquierda Xunida - tercera fuercia política en númberu de votos y sesta en representación parlamentaria - que se presenten nel conxuntu del ámbitu nacional énte'l bipartidismu xeneráu dende'l PSOE y el PP."