La Coordinadora Ecoloxista denuncia un posible fueu intencionáu nel Espartal

Les sableres del Espartal en conceyu de Castrillón sufrieron esta selmana un fueu que dañó una zona de trés hectarees que taba acabante de recuperase gracies a una intervención del Ministeriu de Mediu Ambiente nesti Monumentu Natural.

El grupu ecoloxista que representa Fructuoso Pontigo tien puesta una denuncia énte'l fiscal de Mediu Ambiente d'Asturies pa qu'investigue la posible intencionalidá del fueu qu'abrasó'l pasáu 3 d'ochobre un total de cerca de trés hectarees de matos nes sableres del Espartal, espaciu protexíu reconocíu pol PORNA como monumentu natural y que s'asitia en conceyu Castrillón atiestando cola raya con Avilés.

La Coordinadora diz que resulta "evidente" la intencionalidá del fueu, qu'echaba un fuerte golor a gasoil y qu'atoñó dempués de que los bomberos lu apagaren, y tien mieu de la esistencia d'intereses particulares que quieran estrozar un espaciu de tan altu valor como el de L'Espartal. La coordinadora fai referencia nesti sentíu a les numberoses "amenaces" qu'hai nel futuru del Espartal que sufre dende hai tiempu la presencia del puertu d'Avilés y d'Asturiana de Zinc, ello agora xunto cola presión inmobiliaria, cola intención d'urbanizar parte del so espaciu, al dicir del grupu conservacionista "col consentimientu del Conceyu de Castrilón". Too ello lleva a la Coordinadora a investigar si foi acción d'unos gamberros o si había "otros fines" na destrucción del sistema de les sableres del Espartal.