Aboño, la tercer térmica más contaminante d’Europa

La organización ecoloxista WWF/Adena fizo públicu ayeri un informe sobre les centrales térmiques más contaminantes d'Europa.

El llistáu, qu'atiende a les emisiones a l'atmósfera de dióxidu de carbonu en rellación al kilovatiu de corriente producíu, asitia a la central griega de Hagios Dimitiros como la más contaminante del continente, con 1.350 gramos de CO2 por cada Kilovatiu/hora que produxo. La térmica asturiana d'Aboño, na raya ente Xixón y Carreño y propiedá de la filial asturiana d'Electricidade de Portugal HC Enerxía, tien el tercer puestu d'esta llista con 1.270 gramos por KW/H.

La central d'Aboño produz nun añu una media de 7,45 millones de tonelaes de CO2, l'equivalente a les emisiones medies d'un millón y mediu de coches. Adena rescampla nel so informe que si la térmica asturiana se sustituyere por otra tamién de carbón pero con distintes técniques aforraría la emisión de 2,75 millones de tonelaes de CO2al añu, una mengua que llegaría a los 5,35 millones de tonelaes de CO2 menos en casu de cambiase por otra de gas.

De les trenta centrales europees que más dióxidu de carbonu emiten acordies col so nivel d'eficiencia por kilovatiu hora nueve son d'Alemaña, cinco polaques, cuatro italianes, cuatro ingleses, cuatro españoles, dos griegues, una checa y una portuguesa. El sector eléctricu echa a l'atmósfera'l 37% del total del CO2 del mundu y ye responsable del 25% de les emisiones n'España, según los datos de WWF/Adena.
La responsable de Cambéu Climáticu d'esta organización, Mar Asunción, pidió que se dea un procesu de sustitución de les térmiques a carbón por otres a gas o por enerxíes renovables, un procesu que WWF Adena cree que pue acelerase negándo-yos derechos d'emisiones de gases d'efectu invernaderu a les centrales a carbón nel II Plan Nacional d'Asignación 2008-2012.

Entrar al informe de WWF/ADENA