Andecha píde-yos a los conceyos asturianos que refuguen la candidatura galaico-portuguesa a la UNESCO

El 27 de payares la UNESCO va estudiar en París la candidatura multinacional que defende la declaración como Obra Maestra del Patrimoniu Oral y Imaterial del Patrimoniu Imaterial Galego-Portugués, una candidatura que promueve l'Asociación Cultural y Pedagóxica Ponte...nas ondas! y que cuenta col sofitu institucional del Gobiernu Portugués y el de la Xunta de Galicia. La candidatura resquemó en bien de sectores de la sociedá asturiana por enxertar nella a 18 conceyos del occidente asturianu.

Ello ye pal partíu Andecha Astur una propuesta "colonialista gallega" énte la que ye evidente la falta d'esmolecimientu pol tema de los partíos mayoritarios PSOE y PP más allá de declaraciones públiques escandalizándose pola presentación de la candiddatura. La formación nacionalista quier agora llevar una propuesta a los ayuntamientos afectaos na que-y piden a la UNESCO que los escluya de la candidatura o que nel so casu refugue la candidatura na so totalidá.

Andecha Astur diz que la iniciativa parte de los gobiernos gallegu y portugués, que pela so cuenta y riesgu enxertaron na mesma a los territorios del occidente asturianu sobre los que nun tienen xuridisdicción nenguna y qu'amás nun tan representaos na comisión de trabayu de la candidatura. Otramiente, Andecha ve na candidatura graves defectos al presentar como esclusivamente gallego portugueses formes culturales que son comunes a toa Europa y escaecer la esistencia de manifestaciones culturales específicamente asturianes que se dan en territoriu gallegu.

El partíu nacionalista alvierte que, en casu de salir alantre la candidatura, el patrimoniu cultural de la zona occidental de Asturias enxertaríase oficialmente nel de Galicia y Portugal al traviés d'una resolución del más altu nivel, emitida por un organismu que tien la másima autoridá mundial en materia cultural como ye la UNESCO.