Deceición nel Tartiere

L'Uviéu perdió ayeri una gran oportunidá pa metese na parte alta de la clasificación y enganchar a una afición que paez qu'entama a desmotivase. El segundu filial col que s'enfrentó l'equipu azul llevó con toa xusticia los tres puntos en xuegu nel primer partíu con horariu d'iviernu d'esta temporada.
El partíu púnxose bien pal Uviéu cuando a los 22 minutos Yerai y Nacho García consiguieron xuntar los únicos pases con sentíu del equipu azul en tol partíu y el pichichi azul foi a batir al porteru vascu. L'Alavés B siguió xugando como taba faciendo y lo que foi peor l'Uviéu tamién, asina nel minutu 37 y dempués d'ún más de los munchos fallos defensivos, Gabri, que fizo un gran partíu, marcó un bon gol que facía dalgo de xusticia nel marcador. El filial del Alavés yera superior, ensin ser más qu'un equipu del montón polo menos xugaba como equipu y taba bien puestu nel campu.


Rivas fizo cambios, Nacho Rodríguez y Xandru entraron por Yerai y Jon Carrera, pero l'equipu siguió igual, ensin bandes, ensin criteriu nel centru´l campu, ensin combinar más de dos pases, ensin recuperación y con munchos fallos defensivos y de concentración. Foi nel minutu 82 cuando Rivas acabó d'iguar el partíu metiendo a Adrián por N. Matador. Yera poné-ylo mui fácil al contrariu, y asina foi que Toquero marcó'l definitivu 1-2 nun rápidu y acertáu contrataque nel minutu 38, solo un minutu dempués de saltar al campu. Quedaben pocos minutos pero l'Uviéu nunca nun tuvo rempuesta y l'afición abandonó'l Tartiere con enfadu y muncha desilusión "qué quies, ye lo qu'hai" yera'l comentariu que más se sentía al marchar del campu. En definitiva, otru mal partíu azul nel que la única diferencia colos anteriores tuvo en que nun s'atopó la suerte de los partíos col Zamora y el Palencia y los tres puntos marcharon pa Gasteiz con toa xusticia.