El parlamentu catalán robla l'estatutu por mayoría absoluta

Por 120 votos a favor y namás 15 en contra nuna votación que se desarrolló espresando cada diputáu la so decisión en voz alta, el Parlmentu Catalán ta acabante d'aprebar el testu del nuevu estatutu d'autonomía pa Cataluña, qu'agora queda pendiente d'un trámite en Congresu de los Diputaos que se prevé abegosu, en cuantes que fontes del gobiernu aseguraron a distintos medios de comunicación que'l testu acabante d'aprobar "ye inalmisible".

El ciclu de renovación de los estatutos d'autonomía avanza tres de l'aprebación del nuevu estatutu valencianu cola del catalán, que se robló esta mañana con mayoría achaplante en Parlamentu de Cataluña. Namás los diputaos del PP votaron en contra del testu del nuevu estatutu, que contó col preste de tolos demás grupos. Les palabres de los representantes de tolos partíos catalanes esta mañana tan estraes d'optimismu, y asina mientres el socialista Pasqual Maragall declaró que "la batalla del estatutu agora ta n'España" l'ex-presidente catalán Jordi Pujol, qu'asistió a la sesión en calidá de convidáu faló de "un bon estatutu". El nacimientu del nuevu testu orgánicu de la comunidá autónoma catalana vieno dempués de que PSC; ICV, ERC y CiU apautaren un alcuerdu de mínimos sobre la financiación de la Comunidá Autónoma. La referencia nel testu estatutariu al calter llaicu de la escuela pública catalana foi otru de los puntos de tensión ente les distintes fuerces d'izquierdes y de dereches representaes en parlamentu.
Más información nel diariu electrónicu catalán Vilaweb