Llangréu presenta campaña de normalización llingüística

"L'Ayuntamientu de Llangréu presentó esti martes 18 de marzu la so nueva campaña de normalización llingüística nel sector hosteleru. Trátase d'una campaña específica p'actuar sobre la hostelería del conceyu, continuación de la que yá se punxera en marcha l'añu pasáu con una mui bona acoyida: ""Equí tas en casa"". La campaña busca fomentar el consumu del sector hosteleru de Llangréu faciendo al empar que la propia hostelería faiga d'axente dinamizador de la llingua asturiana.

L'actu de presentación tuvo presidíu por María Fernández, Alcaldesa en funciones de Llangréu, Ana Oliva Rodríguez, Conceyala de Cultura, Turismu y Política Llingüística, Javier Fernández, presidente de l'Asociación d'hosteleros de Llangréu y Eloy Antuña, Responsable del Serviciu de Normalización Llingüística.

Los materiales, presentaos con un diseñu identificativu, van consistir na edición de 10.000 trípticos de tamañu bolsín nos que s'ufierta la denomación de los pexes y mariscos en seis llingües diferentes ente les que s'atopa l'asturianu. Asina mesmo, y tamién como material a repartir per restaurantes, bares y sidreríes, van editase un conxuntu de materiales d'usu na hostelería, talos como sobres d'azucre, serviyetes y toallines de llimón, que valgan amás como soporte pa la tresmisión d'información turística del conceyu de Llangréu. Asina rescampla la información impresa nos sobres d'azucre y les toallines de llimón, onde pue vese'l cartelu publicitariu de dos de los museos más importantes del conceyu: la Pinacoteca Eduardo Úrculo y el Muséu de la Siderurxa d'Asturies."