Concursu de rellatos en Cangas del Narcea

La conceyalía de Cultura de Cangas del Narcea convocó la cuarta edición del concursu de relatos en llingua asturiana "Ayuntamientu de Cangas del Narcea". El certame ta abiertu a los mayores de 16 años con un solu trabayu por autor qu'ha de ser d'ente cinco y venti páxines de tema llibre. El premiu pal ganador ye de 600 euros, 300 pal finalista y 200 pal tercer clasificáu, mientres que la organización acuta un premiu especial d'otros 600 euros pal meyor relatu n'asturianu occidental que nun se premiare nel concursu xeneral.

El plazu de presentación remata'l 28 d'ochobre y los relatos han mandase a la Oficina d'Información Xuvenil de Cangas del Narcea per triplicao al traviés de corréu certificáu ensin poner el remite en sobre, pero enxertando dientro del unviu un segundu sobre zarráu colos datos personales del autor. La conceyala de Cultura va presidir el xuráu nel que van tar el responsable de Normalización Llingüística del Ayuntamientu, mayestros d'asturianu y un representante de l'Academia de la Llingua Asturiana .

Ezequiel Cala Arias (1976) ganare la III edición del concursu, nel que tamién resultaern premiaos los trabayos de Pablo Rodríguez Alonso y el periodista de Radio Llangréu Naciu Varillas, mientres que Diego Rodríguez Martínez resultó'l ganador na categoría d'asturianu occidental pol so relatu "Pente neveiros".

Amás d'esta convocatoria, l'Área de Cultura del Conceyu de Cangas dio anuncia de que va convocar xunto col yá tradicional cursu básicu d'asturianu otru de perfeccionamientu .