BA denuncia la situación de los presos saharauis en fuelga de fame

"Bloque por Asturies denuncia, pente medies d'una nota prensa, el grave peligru nel que s'atopen los presos políticos saharauis deteníos na Prisión Local de Salé y na Prisión Negra d'El Aaiún. Dende la formación piden ""una rápida y urxente intervención pa salvar les vides d'estos presos en fuelga de fame indefinida"". Sorráyase sobre manera l'estáu de salú del presu políticu Said El Beil-lal, que nun podría ""andar nin falar"", sufriendo amás ""perda de consciencia, aumentu del ritmu cardiacu, baxada de la presión del sangre, perda de suañu, inflamación de los riñones y diarrea"".

Por too ello'l Bloque por Asturies quier informar de la fuelga de fame d'estos presos, entamada'l 25 de febreru na Cárcele Negra d'Aaiún y el 25 de febreru na Cárcele Local de Salé. A lo que tien de sumase'l restu de les fuelgues entamaes el día 10 de marzu nes prisiones marroquís de Taroundant, Tiznit, Ait Melloul y Kenitra, como protesta a les condiciones de detención y la vulneración de los ""drechos llexítimos afitaos nes convenciones y trataos internacionales aplicaos a los presos de conciencia"".

Asina BA fai ""un llamáu al Gobiernu Asturianu y al Gobiernu Español pa que-yos desixan a les autoridaes marroquís la lliberación de los presos políticos saharauis y el fin de les violaciones de los drechos humanos llevaes a cabu pol Estáu marroquí escontra los ciudadanos y ciudadanes saharauis""."