Venti asociaciones denuncien "la desapaición de l'Asturies que conocemos" baxo la presión urbanística

Venti asociaciones ecoloxistes y de vecinos de distintos llugares d'Asturies firmaron conxuntamente un manifiestu "en defensa del territoriu asturianu" nel que denuncien la presión urbanística qu'amenaza la costa y les parroquies rurales asturianes. El manifiestu, qu'asegura que la costa asturiana va "camín de la privatización urbanística cola bendición del Principáu" que nun tien nel recién aprebáu plan d'Ordenación del Litoral preséu col qu'aparar la riestra de proyectos d'urbanizaciones y campos de golf qu'igüen pa esti grupu una auténtica "ofensiva urbanística" consentida dende l'alministración.

Les organizaciones firmantes concueyen en que'l campu y la costa asturianos tan "nuna situación crítica" que vien por culpa del "modelu territorial imperante, qu'afala un progresu que beneficia a unos pocos col dañu pa la mayoría, sobremanera les zones rurales". Les venti organizaciones firmantes tienen pa elles qu'esti tipu d'actuaciones hipotequen el mediu rural, lo que va llevar a "la desapaición de l'Asturies que conocemos" al empar que denuncien la "indefensión cada vegada mayor" en que se ven asociaciones, colectivos y persones individuales énte l'agresión al territorio y énte l'actuación nesti sentíu de la mesma Alministración asturiana" afirmando que tan cansos de que-yos toque ser la parte feble en casos de favoritismu, ocultación de datos y corrupción política, polo que reclamen tresparencia nes actuaciones urbanístiques y na información sobre les mesmes y que s'apauten unos criterios reales de respetu al mediu ambiente.

Amigos y Vecinos de Llanes (Avall) foi la entidá qu'echó a andar esti manifiestu, que tamién soscriben l'Asociación de vecinos "Sueve Verde" de Colunga, les Asociaciones de Vecinos d'Outur, Barcia y Cadavéu, en Valdés, la Plataforma pa la defensa de la Zona Rural de Xixón, Asociación Vecinal Parres; Asociación Vecinal Lieres-Solvay de Siero, l'Asociación de Vecinos San Cristóbal de Valdés, la Plataforma vecinal Oru Non de Salave, en Tapia, Asociación "Siglo XXI" de Muros de Nalón; Asociación Vecinal de San Xuan de l'Arena, l'Asociación Vecinal Santa María del Mar de Castrillón y los grupos Colectivu GREEN, Ecoloxistes n'Acción, Coordinadora Ecoloxista, Colectivu La Cirigüeña de Morcín, la Plataforma contra la llinia d'alta tensión Lada-Velilla, l'Asociación Cambalache d'Uviéu, y L'Arcu La Vieya, d'Uviéu.