Lluis Miguel Orviz, responsable de política llingüística de la Mancomunidá de la Sidra

Lluis Miguel Orviz resultó la persona escoyida nel procesu de selección pa responsable de la oficina de Política Llingüística de la Mancomunidá de la Sidra, que se celebró ayeri. Pendiente d'incorporase al puestu, cosa que va asoceder d'equí a la vuelta d'unos díes, Orviz declaró que garra'l cargu con muncha ilusión y con idees y proyectos que-y prestaría poder llevar alantre, anque consciente de que la oficina de la que va facese cargu presenta mayores problemes qu'otres, derivaos sobremanera de la so estensión, al ser la única que s'encarga d'un total de cinco conceyos. La de la sidra ye tamién la oficina de normalización que tien mayor presupuestu, acordies col repartu de subvenciones a los conceyos que se dio anguaño na Conseyería de Cultura, y que van potenciar sobremanera les actuaciones en materia de toponimia. Dende Asturies.com deseámos-y lo meyor a Lluis Miguel Orviz, collaborador dende vieyo d'esta casa.